Дезинфекция ишлер юрютелер

Шо балагьны алдын алмакъ учун ерлерде къыставуллу гьаракат да юрюле. Айтагъаным, ишчи-загьматчы халкъ ишлеринден азат этилип, уьйлеринде сакълыкъны шартларында яшавлукъ этелер. Бек чарасыз болмагъан адам машинлер булан айланмай. Эсгерилген аврувну вирусларындан сакъланмакъ учун кёплер бетине маскалар, къолларына къолгъаплар гийип туралар. Шо аврувну акъубасындан къутулмакъ учун бизин Къарабудагъгент районубузну юртларында да кёп ишлер юрюле. Айтагъаным, районну башын тутгъан Магьмут Амиралиевни гьаракатчылыгъы булан ерлердеги больницалар, ФАП-лар толу гюч булан, гечесин-гюнюн бир этип ишлейлер. Юртларда коронавирусну яйылывуна къаршы чакъда-чакъда орамлагъа, адамлар ишлейген идаралагъа дарман сувлар булан дезинфекция этилип юрюй. Аптеклерде халкъ учун маскалар, къолгъаплар етишмей деп, етише буса да гьатдан озуп багьалары гётерил­генине гёре, районну школаларында загьмат дарсланы юрютеген муаллимлерини гьаракаты булан кёп санавда маскалар, къолгъаплар тигип юрюйлер. Шолар да юртлулагъа тегин яда буса учуз багьада бериле. Муна бугюнлерде май айны 25-нде бизин районну юртларында дезинфекция ишлер оьтгермек учун Россия федерацияны МЧС-ини Ногинский центрындан 8 адамдан къурулгъан бригадасы гелген. Шо бригаданы ерлерде дезинфекция этмек учун хас техникасы, парогенераторлары, МСПО машин ва бензин булан ишлейген, гьазирленген дарман сувланы чачагъан алатлары бар. Олар башлап юртланы айланып, къайсындан башлама гереклигин токъташдыргъан. Май айны 26-сындан берли гелген хас бригаданы уьюрлери юртларда вирусгъа къаршы дезинфекция ишлерин юрютюп туралар. Оьзлени турушу буса «Анжи мастер» ДСОЛ-ну базасында ерлешген.