Овошчуларыбызны ишлери гёрмекли
Бизин районну гьава шартлары, оьзге бар имканлыкълар районну муниципал къурувларында ябыкъ топуракъда овошлар оьсдюрюв булан машгъул болма бары да шартлар бар. Витамин продукциягъа йылны не заманында да яхшы талап бар. Шо саялы болма да ярай, муниципал къурулувларда, айрокъда Уллубийавул, Паравул, Аданакъ, Къарабудагъгент юртларда артдагъы йылларда теплицалар къурув чалт темплер булан юрюле.
Буссагьатгъы вакътиде, умуми алгъанда, районда къоллавгъа берилген 234 гектар майданда теплицалар бар. Янгыз гетген йыл районда 20 гектарда теплицалар къурулгъан. Овошчулукъ тармакъда далапчылыкъ булан машгъул ёлдашлар теплица хозяйствону оьсювюн болдурмакъ муратда оьзлени 800 миллион манат акъчасын салгъан.
Районда теплицаланы майданлары генглешип къалмай, овошчулар ишде янгы технологияланы, алдынлы иш сынавну, сайламлы урлукъланы къоллап участкалардан алынагъан овошланы къадарын да артдырма бажаргъанлар. Гьакъыкъатда гетген йыл районубузну ябыкъ топуракъда овошлар болдурувчулары 35,5 минг тон витамин продукция болдурма бажаргъанлар. Республикада гьар йыл ябыкъ топуракъда болдурулагъан овошланы 25 процентден къолайын бизин районну овошчулары болдура. Бугюнлерде районну овошчулары теплицаларында овошланы тюшюмюн массовый кюйде жыйма ва сатывгъа чыгъарма башлагъан. Башлапгъы гьасиллер къуванчлы ва яхшы багьалары да бар. Хайырын гёрюгюз.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
