Гюзлюклер азыкъландырыла

Масъала, гетген йыл районда умуми алгъанда 14783 гектар топуракълагъа гюзлюк, язлыкъ къыл­чыкълы ашлыкълар чачылгъан эди ва яхшы тюшюмлер де къайтарылды.

2023-нчю йылны тюшюмю учун гетген гюзде 11 минг гектардан къолай топуракълагъа гюзлюк къылчыкълы ашлыкълар чачылгъан. Районну муниципал къурулувларында язлыкъ къылчыкълы ашлыкълар чачыв давам этилип тура.

УСХ-ны касбучулары районну юрт хозяйство продукталар болдурувчуларына оьзлени къолундан гелеген гьар тюрлю кемеклени, тарыкълы документ кагъызланы онгарма кемегин де этелер.

Районну юрт хозяйство управлениесини касбучулары оьсюмлюклеге этилеген къуллукъланы сан янына, болжалларына да тергевюн болдура ва тарыкълы ерде далапчыгъа пайдалы насигьатлар берелер.

Алдагъы гюнлерде УСХ-ны баш агроному Магьамматшапи Абдулвагьабов ва Россельхозцентрны бизин райондагъы бёлюгюню начальниги Абсерпаша Къыявов ёлдашлар Къакъашура зонада чачылгъан гюзлюклеге эрте язбашда этилме герекли ишлени барышына, гюзлюклени гьалына тергев этип чыкъгъанлар.

Эрте язбашда гюзлюклер агротехника гёрсетеген кюйде минерал кюйлевючлер берилип азыкъландырылса яхшы бола.

Районну юрт хозяйство управлениесини баш агроному М.Абдул­вагьабов ва россельхозцентрны бизин райондагъы бёлюгюню ёлбашчысы А.Къыявов ёлдашлар Къакъашурагъа этген сапарында юрт хозяйство тармакъда узакъ йыллар чалышагъан, сынавлу далапчы Сахават Алчагъыровну участкасында болгъанлар. Шо гюн фермер гюзлюклерин селитра берип азыкъ­ландырыв ишлени оьтгерип тура.

С.Алчагъыров бу йылны тюшюмю учун 350 гектаргъа чачылгъан гюзлюк, язлыкъ къылчыкълы ашлыкъ­лары бар. Гюзлюклени азыкъландырывда тракторист Абдурагьман Ягьияев тапшурувларына намуслу янашып ишлей. Ону гьаракаты булан касбучулар баргъан гюн 150 гектар гюзлюклер азыкъландырылгъан. Гюзлюклени азыкъландырыв узатыла.