Гюз чачывну алдында

Артдагъы йылларда, умуми алгьанда, районну муниципал къурулувларында 15 минг гектаргъа ювукъ топуракълагъа гюзлюк ва язлыкъ къылчыкълы ашлыкълар чачыла.

2022-нчи йылны тюшюмю учун чачылгъан ашлыкъланы тюшюмюн къайтарыв уьстюнлю кюйде тамамлангьан. Авлакъчыларыбызны, механизаторланы къайратлы загьматы, оьсюмлюклеге этген къуллукъланы натижасында ашлыкъланы гьар гектарындан 28 центнерден къолай тюшюм алынды. Шо – гёрмекли натижа.

Авлакъланы тюшюмю къайтарылды деп, ашлыкъ оьсдюрювчюлеге рагьатланма чола ёкъ. Гелеген йылны тюшюмю учун алгъасавлу кюйде гьазирлик гёрме заман етишген. Демек, топуракъланы сюрме, тегишлеме, чачыв даражасына етишдирме тарыкъ.

Бу йыл гюзде гелеген йылны тюшюмю учун районну муниципал къурулувларында 10730 гектаргъа гюзлюк къылчыкълы ашлыкълар чачма гёз алгъа тутулгъан. Айтма тарыкъ, ерлерде гюз чачывгъа гьазирлик гёрюв, оьзге йыллар булан тенглешдиргенде, эртерек башлангъан, сюрюв ишлер жанлы юрюле. Балики бу йыл ашлыкъ болдурувда къолда этген уьстюнлюклер авлакъчыларыбызны ругьун гётередир. Нечакъыда яхшы. Артдагъы гюнлерде болгъан яхшы дагьнилер ашлыкъ чачма къасты бар ёлдашлагъа заказгъа йимик явду. Болгъан дагьнилерден сонг сюрюв ишлер дагъыдан-дагьы чалтлашма бола.

Буссагьатгъы вакътиде районда гюзлюклер чачмакъ учун сюрюлген 7648 гектар топуракъ бар.

Сюрювге умуми алгьанда 40 трактор къуршалып ишлер юрюле.

Гёз алгъа тутулгъан топуракълагъа чачмакъ учун авлакъчылагъа 2414 тон урлукъ тарыкъ. Буссагьатгъы вакътиде районну юрт хозяй­ство предприятиелеринде 1940 тон урлукъ бар. Шо районгъа тарыкъ чакъы урлукъну 80,4 проценти бола.

2022-нчи йылны тюшюмю учун гетген гюзде 600 гектаргъа оьр (элита) сортлу урлукъ чачылгъан эди. Шондан 1,2 минг тон 1-нчи репродукциялы урлукъ алынды. Шо 2023-нчю йылны тюшюмю учун 6 минг гектардан къолай майданлагъа сайлам урлукъ чачма имканлыкъ бере. Ондан къайры да, фермерлерибиз районгъа 200 тон оьр сортлу гюзлюк ашлыкъланы урлугъун гелтирме хыял эте.

Районда гюз чачывгъа 46 техника ва тарыкълы алатлар онгарылгъан.

Ишлени, сюрювню барышына къарагъанда, районда гюз чачыв лап макъталгъан болжалларда оьтежеги не шекленме тюшмей.