Уялма тарыкъ!!!

Умуми алгъанда, районну авлакъчыларыны гёнгю яман гёрюнмей. Участкалардан яхшы тюшюмлер къайтарыла.

«Къурбуки» деген сабанчы-фермер агьлю районда уьлгюлю коллектив деп айтма болабыз. Ону ёлбашчысы Магьамматзакир Нухов гьаракатчы, чинк­деси, эринмейген, ишге тавакал кюйде янашагъан адам. «Къурбуки» КФХ юзюм, емиш бавлары булан бирче гюзлюклер чачыв булан да машгъул. Магьамматзакир Нухов чачагъанда да оьр сортлу урлукълар чача.

Алдагъыгюн, мен ону булан ёлукъгъанда, ишлени гьакъында сорап алдым. Негер буса да, ону гёнгю ёкъ.

– Закир, не болгъан, участкаланы тюшюмю осал сама тюгюлмю?

– Участкаланы тюшюмю яхшы, тек гьайванлар бир-бир участкаларыма бек зарал этген. Сёз «Салтабакъ» участкаларымны гьакъында юрюле. 8-9 гектар майдандагъы ашлыкъ тарлавлагъа комбайны гийирме маънасы ёкъ. 17 гектардагъы ашлыкъланы гьар гектарын орта гьисапда 23-25 центнерни ерине, 17 центнер тюгюл чыкъмады, гьайванлар таптап кёп пуч этген.

– Гьайванлар къайдан геле?

– Къарабудагъгент юртну «Бой­накъ кёпюр» участкасындагъыланыки. Нече керенлер барып айтгъанман, артында туруп отлатыгъыз деп тилегенмен. Тилесем-тилейим, гьеч алышыныв ёкъ. Мен гьар алгъан ашлыгъымдан Къурбуки юртдагъы чарасызлагъа закат чыгъараман, гьайванларын саякъ къоягъанлар янгыз магъа зарал этип къоймайлар, пакъырланы рызкъысын да къыркъа,- деди фермер.

Гертиден де, гьайванларын къаравсуз къоюп адамгъа зарал этме яхшы тюгюл. Чачывлар йылда бир керен бола, ондан къайры да махлукъгъа рызкъы.