Заманында чачылса…
«Гьар зат оьзюню заманында яхшы» дегенлей, чачыв ишлени де огротехника талап этеген болжалларда оьтгерме гьаракат этилсе, натижалар къуванчлы болмай къалмас.
Озокъда, авлакъ ишлени оьз заманында, къурумлу кюйде оьтгермек учун техника якъдан имканлыкълар да болма тарыкъ. Шо якъдан алгъанда, бизин районну юрт хозяйство тармагъыны къуллукъчулары техника, олагъа тиркелеген тарыкълы алатлар булан толу таъмин деп айтма къыйын. Барларыны да 80 процентден къолайыны иш ресурслары тезден битген.
Шолай эсги болгъан техника булан да авлакъ ишлени заманында оьтгерме болагъан юрт муниципал къурулувланы загьматчыларыны гьаракатына къарап къуванасан.
Гьели юрт муниципал къурулувну авлакъчылары артдагъы 5-6 йылны ичинде тоупракъланы асывлу къоллап ишлетивде хоншулагъа уьлгю болуп токътагъан. Айтагъаныкъ, мунда йылдан-йыл кёп майданлар ишлетиле ва чачыла.
Гьелили механизаторлар 2023-нчю йылны тюшюмю учун, гюз чачывну да лап макъталгъан болжалларда оьтгерме бажаргъанлар. Буссагьатгъы вакътиде Гьелиде 1600 гектардан къолай топуракълагъа гюзлюклер чачылгъан.
Чачылгъан деп айтып къойсакъ да шо тюз болмас. Лап агротехника талап этеген болжалларда чачылгъан участкалар барысы да бир тегишден чыгъып, залим тамур тутуп геле. Озокъда, шолай участкалар къышны сувукъларындан уьстюнлю кюйде чыгъып, яхшы тюшюмлер булан къайтарыш этежегине шекленме тюшмей. Оьзге муниципал къурулувларда да топуракъланы ишлетивге жаваплы янашып иш гёрюлсе, стратегия агьамияты булангъы хамалны болдурувда бизин районну сабанчыларыны да къошуму аслам болур.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
