«Салтабакъда» булкъа
Гьар муниципал къурулувну мол гелимлер береген топуракълары бар. Къурбуки юрт муниципал къурулувну «Салтабакъ» участкасы шолайлардан санала. Къачан да бу топуракълар яхшы гелимлери булан макъталып гелген.
Оьзюне Абсамат Нухов башчылыкъ этеген «Къурбуки» деген сабанчы фермер агьлю артдагъы йылларда топуракъланы асывлу къоллай туруп, юрт хозяйство продукталар болдурувда яхшы натижаланы къолда эте гелегени кимни де къувандыра. «Къурбуки» КФХ-ны уьюрлери ашлыкъ, юзюм, гьайванчылыкъ продукталар болдурув булан машгъул.
Муна, бугюнлерде «Къурбуки» КФХ «Салтабакъ» участкада гюз чачывну узатып туралар.
Чачыв ишлени барышы гьакъда сабанчы-фермер агьлюню ёлбашчысы Абсамат Нухов булай деди:
– Биз «Салтабакъ» участкада 300 гектар топуракъланы ижарагъа алып ишлетебиз. Ондан къайры да Манас зонада 50 гектардан къолай чачыв топуракъларыбыз бар. Бары да топуракъларыбыз хас агрегат булан челизный къайдада ишлетилген. Бу агрегат топуракъны 30-40 сантиметрге хотгъай. Шо буса болгъан дагьнилеге, оьсюмлюклени тамурларына терен гетме онгайлыкълар ярата.
«Салтабакъ» участкада чачывда 3 агрегат ишлей.
Гюз чачывну биз огротехника талап этеген кюйде оьтгерме гьаракат этебиз.
Гертиден де, «Къурбуки» КФХ-ны ёлбашчысы огротехника талапланы тюз юрютме къаст эте. Топуракъгъа сан янлы, 1-нчи репродукталы, агъуланып гьазир урлукъ тёгюле.
Чачывгъа къуршалгъан механизаторлар чачыв ишлени чалтлашдырмакъ учун оьзлени къолундан гелеген бары гьаракатны этелер.
«Къурбуки» КФХ районда яхшы материал-техника базасы булангъы предприятиелени бири. Булар топуракъны ишлетмек учун тарыкълы тиркелеген алатлары булан таъмин. Чинкдеси, оланы экиси янгы техника. Олар КФХ-ны ишлерин заманында кютме болушлукъ эте.
Биз «Къурбуки» КФХ-ны «Салтабакъ» участкасында чачыв ишлени барышын, механизаторланы гьаракатын гёргенде, гележекге инамлыкъ булан къайтдыкъ.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
