Ким нечакъы ерге ашлыкълар чачгъан?

Бу йыл гюзде гелеген йылны тюшюмю учун районну муниципал къурувларыны топуракъларында 10730 гектаргъа къылчыкълы гюзлюк ашлыкълар чачма гёз алгъа тутулгъан. Районда гюз чачывну барышы нечик­дир? Ким нечакъы ерге къылчыкъ­лы гюзлюк ашлыкълар чачгъан? Олгюн биз районда гюз чачывну барышы булан таныш болмакъ муратда районну юрт хозяйство управлениесини баш огроному Магьамматшапи Абдулвагьабов, баш инжинери Ж.Акъаев ёлдашлар булан авлакъланы айланып, чачгъанланы гёрюп къайтдыкъ.

Районда гюз чачывну барышы гьакъда баш огроном булай деди:

-Оьрде де эсгерилип гетгени йимик, район бу йыл гюзде 10730 гектаргъа гюзлюк ашлыкълар чачма гёз алгъа тутгъан. Районда шо муратгъа деп сюрюлген 10920 гектарда топуракъларыбыз бар. Ерлерде чачыв ишлени барышы да яман гёрюнмей. Буссагьатгъы вакътиде 8740 гектаргъа гюзлюклер чачылып битген.

Чачыв ишлени барышы умуми алгъанда яман тюгюл деп айтма болабыз. Къурбуки, Губден муниципал къурулувларда юрт хозяйство агьамияты булангъы топуракъланы асыв­лу къоллавгъа гьайлы янашагъаны гьис этиле. Айтагъаныкъ, буссагьатгъы вакътиде Къурбукиде 2400, Губденде 2200 гектаргъа гюзлюк ашлыкълар чачылгъан. Гьели муниципал къурулувда да топуракъланы асывлу къоллавгъа жаваплы янашагъаны бир-нече йыллар бола. Мунда буссагьатгъы вакътиге 1600 гектаргъа гюзлюклер чачылгъан.

Гюз чачывну барышы бары да муниципал къурулувларда яхшы деп айтса дурус болмас. Масъала, кёп чачыв топуракълары бар Къакъашура юртда, имканлыкълары кёп буса да, 520 гектаргъа тюгюл ашлыкълар чачылмагъан. Оьзге муниципал къурулувлар да чачывгъа тергевню гючлендирсе, ишлер дагъы да къуванчлы болур, чакъ да шогъар болушлукъ эте.

Районда гюз чачывгъа къуршалгъан техниканы гьакъында айта туруп, баш инженер Ж.Акаев бугюн-буссагьат районда чачывгъа 30-дан да къолай агрегат къуршалгъанны эсгерди. «Районну фермерлери гьар тюрлю программалагъа къошулуп оьз­лени техника паркын янгыртмакъны да гьайын этелер. Бу йыл районда 3 дёгерчекли янгы техника алынды.

Районда бар техника булан чакъгъа сувукълар тюшгюнче гюз чачывну уьстюнлю кюйде тамамлажагъыбызгъа мен бир де шекленмеймен», — деди баш инженер.

Гертиден де, районну авлакъларында гюз чачывну барышы юрекни къувандыра. Механизаторлар, авлакъчылар гюнню пайдалы къоллай туруп, чачыв ишлени геч болгъунча узаталар.