Ишлер давам этиле

Шоллукъда, Уллубийавул юрт­ну эсги авулларындагъы ичеген сув гелеген ташбулакъланы сув быргъылары тыгъылгъангъа гёре, шо булакълардан гелеген сувну оьлчевю аз болгъан эди. Шону гёз алгъа тутуп, Сатайавулну (Ортавул) ва Очаравулну жагьиллери шо быргъыны янгыртмагъа токъташды. Демек, беш гюнню ичинде 700 метр мезгилни трактор булан къаздырып, 100 миллиметр оьлчев булангъы янгы быргъы салып сонг буса шону басдырдылар. Гьали шо булакълагъа гелеген сувну оьлчевю хыйлы артгъан. Шо ишлени харжын оьзлени бойнуна Ордаш Дадашев алгъан эди. Огъар жамият гьакъ юрекден баракалласын билдире.

Дёргели юртда буса янгы къурулагъан яшлар бавуна газ быргъы тартылыв ишлер юрюлген. Демек, «Демография» деген милли проект­ге гёре, Дёргелиде 200 гиччипав учун янгы яшлар баву къурулгъан. Янгы охув йылны башында шо охув ожакъ пайдаландырывгъа берилежек. Эсгерилген бинаны иссилигин болдурмакъ учун газ быргъы тартылмагъа башлангъан. Юртну администрациясыны баянлыкъларына гёре, шо газ быргъыны узунлугъу – 4,5 километр. Олай да, газ быргъы 1 метр 65 сантиметр теренликден гёмюлежек.

Район администрацияны яшавлукъ коммунал хозяйство ва капитал къурулуш управлениесини хас касбучулары Манасгент юртда Батырайны аты къоюлгъан орамгъа салынгъан янгы асфальтны сан янын тергегенлер. Шо орамгъа салынгъан асфальтны муниципал ёл фондну программасына гёре «Мирстрой» деген ООО салгъан. Олай да, асфальтны сан янына республиканы транспорт ва ёл хозяйство министерлиги тергев этген. Тергевлени натижасы исбатлайгъан кюйде, асфальтны сан янына яхшы багьа берилген.