Ахырынчы гектарланы тюшюмю къайтарыла

2021-нчи йылны тюшюмю учун районну муниципал къурулувларында чачылгъан гюзлюк, язлыкъ къылчыкълы ашлыкъланы майданлары 15 минг гектаргъа хармангъан.

Урлукълар топуракъгъа заманында тёгюлген участкалар яхшы гелимлер берген.

Районда бу йылны ашлыгъыны тюшюмюн къайтарыв ишлер кёбюсю муниципал къурулувларда къурумлу ва сан янлы юрюлдю деп айтма болабыз.

Районда гюзлюк ва язлыкъ къылчыкълы ашлыкъланы тюшюмюн къайтарыв ишлер ерлерде тамамлана бара. Гьели, Губден, Манасгент, Уллубийавул юрт муниципал къурулувда гюзлюклени тюшюмюн къайтарыв ишлер тамамлангъан. Биз маълумат алагъанда Уллубийавул юрт муниципал къурулувда ахырынчы гектарланы тюшюмю къайтарылып тура эди.

Буссагьатгъы вакътиде ерлерде 11055 гектар ердеги къылчыкълы ашлыкъланы тюшюмю къайтарылып битген. Шону 8010 гектары – гюзлюк къылчыкълы ашлыкълар. 3045 гектары – язлыкъ къылчыкълы ашлыкълар .

Орулгъан тюшюмю къайтарылгъан гюзлюк ашлыкъ тарлавланы гьар гектары орта гьисапда 22, 5 центнер тюшюм берген. Язлыкъ къылчыкълы ашлыкъланы гектары 19,8 центнер тюшюм берген.

Районда орулгъан участкалардан умуми алгъанда 26654 тон ашлыкъ басылгъан.

Орта гьисапда районда гюзлюклени гьар гектарындан 23 центнерге ювукъ тюшюм къайтарылгъан буса, бары да агротехника чараланы оьр даражада, чачыв ишлени макъталгъан болжалларда сан янлы ­оьтгерген фермерлерибизни натижалары дагъы да къуванчлы. Масала, Губден юрт муниципал къурулувну топуракъларында авлакъчылыкъ булан машгъул ИП М.М. Османовну гьасиллери инг гёрмеклилеринден бириси гьисаплана. Ол 180 гектар топуракълагъа оьр сортлу урлукълар чачып, гектардан 28,8 центнер тюшюм алгъан.

Гьелили фермер Магьамматса­йит Абсаматов – топуракъда доланагъан, топуракъны хадирин билеген, агротехника къуллукъланы, чачылагъан сан янлы урлукълар мол тюшюмлеге кюрчю салывда агьамиятын яхшы билеген фермер гьисапда тезден арагъа чыкъгъанланы бири. Ол топуракълагъа мекенли къуллукъ эте. Агротехника къуллукъланы тюз оьтгерме гьаракат эте. Шо саялы да ол гьар йыл яхшы натижаланы къолда эте геле. Муна, ону бу йылгъы гьасиллери де къуванчлы. Толкъун уруп турагъан 500 гектардагъы ашлыкъ тарлавларыны ашлыгъын къайтарып, инныргъа тёгюп парахат болгъан. Гьасиллер къуванчлы.

Бугюнлерде районну механизаторлары ахырынчы гектарланы тюшюмюн къайтарып туралар. Оракъ орув Къарабудагъгент, Къакъашура юрт муниципал къурулувларда давам этиле.

“Уллубийавул юрт” муниципал къурулувну топуракъларында иш гёреген “Умаров” деген сабанчы-фермер хозяйствону уьюрлери де 2021-нчи йылны тюшюмю учун 200 гектаргъа чачылгъан гюзлюк къылчыкълы ашлыкъларыны гьар гектарындан 24-25 центнер тюшюм къайтаргъан. Топуракъда айрыча доланагъан, гюзлюклер чачгъан айры-айры ёлдашлар дагъы да кёп тюшюм къайтаргъанлар да бар.

Районну авлакъчылары, механизаторлары 2021-нчи йылны ашлыгъын къайтарыв гьаракатны уьстюнлю кюйде тамамлагъан буса да, гелеген йылны тюшюмюню гьайын эте туруп, ашлыгъы алынгъан тарлавланы саламын тайлагъа къысыв, ташыв ишлени чалтлашдырмагъа тюше. Сюрюв ишлени де чалтлашдырмагъа тарыкъ болажакъ.