Бир мюгьлет де бош турма чола ёкъ

Юртлу загьматчылар заманны асувлу къолламакъ учун, авлакъ ишлени комплекс къайдада оьтгермекни гьайын этелер. Айтагъаным, ем топлав булан янаша ашлыкъ къайтарыв компаниягъа техниканы гьазирлевден, юзюм бавланы къуллукъларын кютювден, аврувланы зиянлы жанланы алдын алыв ишлени оьтгеривден хантав турма ярамай.

Районда яй авлакъ ишлени барышы, ем топлав, гюзлюк, язлыкъ ашлыкъланы, эрте бишеген емлени тюшюмюн къайтарывгъа гьазирлик гёрюв ишлер нечик бара экен?

Бу соравгъа районну юрт хозяйство управлениесини гьакимбашы Шагьабутдин Мустапаев лакъырыбызны булай башлады.

-Гертиден де, къыржан (июнь) ай – юртлу загьматчылар учун инг жаваплы заман. Жамият гьайванлагъа ем топлав булан янаша емишлени эрте бишеген жураларыны тюшюмюн жыйыв, ашлыкъ къайтарывгъа гьазирлик гёрюв ва оьзге авлакъ ишлени къурумлу кюйде оьтгерме тюше.

Бизин районну юрт хозяйство тармагъы генг. Бир макъалада бары да тармакълардагъы ишлени анализ этип язма газетни бир номеринде ер болмас. Шо саялы ем топлавну, къылчыкълы ашлыкъланы тюшюмюн къайтарывгъа гьазирлик гёрювню, емишлени эрте бишеген жураларыны тюшюмюн жыйыв гьакъда сёз юрютсек, дурус болур.

Ем топлав

Гьайванчылыкъ, малчы­лыкъ тармакъ бизин районда чалт оьсе. Гьайван – мал булан доланагъан далапчылар гьайванлагъа токъ къышлав болдурмакъ муратда белбюгюп, этекчалып, гьаракат этип айланалар.

Районда бар уллу ва гиччи мююзлю гьайванланы 2021-2022-нчи йылланы къыш айларында тас этивсюз ­оьтгермек учун 25055 тон бичен, 13605 тон салам, 6382 тон сенаж, 5368 тон тири емлер тарыкъ. Районда жамият гьайванлагъа ем учун 956 гектарда чачылгъан оьсюмлюклерибиз, кёп майданларда табии биченликлерибиз бар. Табии биченликлерде от огьой тюгюл буса да, чачылгъан ем оьсюмлюклерибиз яхшы оьсген.

Бугюнлерде ерлерде жамият гьайванлагъа ем топлавну барышы чалтлаша. Гьалиге 3620 тон сенаж, 122 тон бичен топлангъан.

Районну гьайванчылыкъ тармагъында чалышагъан фермерлери къышлавну гьайын этелер.

Жамият гьайванлагъа мугькам ем база яратывда Къурбукиде КФХ «Къурбуки», Губденде ИП «Нурмагомедов», Къарабудагъгентде Арсанали Минатуллаев, Сиражутдин Алиев ва оьзге далапчылар яхшы сипте гёрсетип ишлейлер.

Емиш бавлар

Бавчулукъ – бизин районгъа хас мердешли тармакъ.

Бизин районубузну емишлери, оланы татыву гьакъда алда кёп айтылгъан. Бизин белгили йыравубуз Агъай Къапланов емиш бавларыбызны берекети, гёзеллиги гьакъда оьзюню йырларында арив суратлагъан.

Гьалиги яш наслу да сыйлы мердешлени инамлы кюйде узатма, бавчулукъ тармакъны дагъыдан-дагъы гётерме белсенип ишлейлер.

Буссагьатгъы вакътиде районда 1211 гектарда емиш бавларыбыз бар, шоланы 253 гектары – янгы къайдада (интенсивный) орнатылгъан бавлар.

Районда бар бавларыбызны 636 гектары планлы кюйде тюшюм бере. Шоланы да 202 гектары – интенсивный къайдада орнатылгъан бавлар. Бу йыл районну бавчулары 6 минг тондан къолай емишлер жыйма умут эте. Шону 4 минг тону къумлу емиш участкалардан къаравуллана.

Бугюнлерде бавчулар баълини эрте бишеген жураларын массовый кюйде жыйма ва сатывгъа чыгъарма башлагъан. Баъли тереклени тюшюмю яман гёрюнмей.

Айрокъда, Къарабудагъгентде фермерлер У.Абужаевни, А.Сайитовну, П. Мамаевни интенсив къайдада чачылгъан баъли бавларыны тюшюмю гёрмекли. Эсен жыйма, хайырын гёрме насип болсун!

Ашлыкъ къайтарыв

Яйны гиривю булан арпа, будай тарлавлар саргъая геле. Районну авлакъчылары, механизаторлары 2021-нчи йылда 13459 гектардагъы къылчыкълы ашлыкъланы тюшюмюн тас этивсюз къолгъа алма тарыкълар.

Бугюнлерде ерлерде ашлыкъ къайтарывда ортакъчылыкъ этежек комбайнланы, оьзге тюрлю юртхозяйство техниканы тарыкълы ремонт ишлери оьтгерилип тура.

Районда ашлыкъ къайтарыв кампанияда 35-ден де къолай комбайн къуршалма бола деп гьисап этиле.