Заман алгъасата

Юзюм бавларда загьматны зангы айлана янгъа чалына. Механизаторлар чёп отлагъа къаршы ябушув юрюте туруп, юзюмлюклени сыдра араларын сюрюв, культивация этив ишлени узатып туралар.

Байлав ишлени чалтлашдырма тарыкъ. Тюекни бюрю мекенли тербенген. Айрокъда юзюмню эрте бишеген жураларыны тюегин байлайгъанда, сакъ айланма тюше. Неге тюгюл, бюрню лап осал вакътиси, хантавлатсанг, бутакъны бюрю тюшме леппей деп тура. Тюшген бюр болажакъ тюшюмге таъсир этегени гьакъ.

Районда ачыкъ топуракъгъа овошланы шитилин гёмюв, бахча оьсюмлюклени урлукъларын чачыв ишлени барышы да гюнден-гюн гюч ала. Буссагьатгъы вакътиге районда тергелмеген далиллеге гёре 18 гектардан къолай майданлагъа ачыкъ топуракъгъа овош оьсюмлюклер чачылгъан. овошлар орнатыв узатыла.

Гетген йыл бизин якъларда чакъ оьтесиз къургъакъ гелип, гьайванлагъа ем топлавда юртлулар уллу четимликлеге тарыдылар. Бизин районда таман даражада къатты емлер топланма болмагъаны саялы, базарларда къатты емлеге талап баргъа гёре емлени багьалары кёкге чыгъып гетди. Март айны экинчи он гюнлюгюнде бизин якъларда болгъан къалын къарлардан сонг, къатты емлени багьалары гьайрангъа къалдырардай гётерилген. Авлакъларда ташланып къалагъан дюгю саламны бир тайыны багьасы 190-200 манатгъа, бир тай люцерна биченни багьасы 380 манатгъа гётерилген эди. Шо саялы айтыладыр: «Алагъанны амалы ёкъ, сатагъанны иманы ёкъ» — деп. Къарлардан сонг гьамечде биченимни битип барагъанын гёргенде, хамисгюн Манасдагъы базаргъа бардым. Оьзюм ошатагъан бичен машинни ягъына барып, багьасын сорадым. Бир тай 320 манат деп разилешип, эки тайны тюшюрюп тураман, ем алма сюеген адамланы кёп гёрюп, сатывчу бир тайны багьасын 350 манатгъа гётерип къойду. Озокъда, шо имансызлыкъ.

Районда къатты емлеге талап йылдан-йыл артып тербейгенин гьис этип, ватандашлар бу йыл да кёп йыл­лыкъ отлар чачма топуракълар онгарып айланагъанлар, чачып къутулгъанлар бар.

Емлени гьакъында сёз чыкъгъанда мен булай масъаланы гётерме сюемен. Алда март ай гелгендокъ, биченликлени гьайван гирме къоймай, от оьссюн деп сакълай эди. Гьали топуракълар халкъны къолунда. “Герейтюз” авлагъыбыз юрт хозяйство агьамияты булангъы топуракълар буса да, бир тайпалар биченин чалып алабыз, топуракъланы ишлетме харжыбыз ёкъ, гючюбюз чатмай деп инжине. Тек олайланы участкалары авлакъда турагъан бир нече адамны гьайван-малына отлавлукълар болуп битген. «Исгири бетлер», «Бёрю къозлагъан», «Асбарай» участкада чакъ онгайлы гелген йыллар биченни жыйып битдирип болмай эди. Бу йыл да яхшы дагьнилер болду, гьали де бар, Иншааллагь, апрель айда да дагьнилер болмай къалмас. Биченликлени жамият гьайванлагъа ем топламакъ учун къолламакъны гьайын этме тюше. Авлакъдагъылагъа да халкъны топуракъларында гьайван-малын ашатып турма уялма тарыкъ.