Юзюмчюлерибизни натижалары къувандыра

Сентябр айны ахырында ерлерде юзюм гесив кампания тамамлаша барагъан вакъти болма герек.

Районда юзюмню тюшюмюн къайтарывну барышы нечик экен?

Бу соравгъа жавап алмакъ учун сентябр айны 28-нде районну юрт хозяйство управлениесини хас касбучусу Гьажакъай Гьажиев булан «Къарабудагъгент юрт» муниципал къурулувну топуракъларында есликни гьар-тюрлю къайдаларында иш гёреген юзюмчюлюк коллективлени янында болдукъ.

Айтып къояйыкъ, къарабудагъгентли юзюмчюлер гьали болгъунча юзюмню тюшюмюн къайтармакъны гьайын этмей, уллу тавакаллыкъ этелер. Гьали гюзню экинчи айы, гюзде жумалар булан янгурлар тутуп, тарлавлагъа трактор булан гирсе тюгюл, дагъы гирип болмайгъан гезиклер болгъан. Я Аллагь, шолай болмасын! Районда юзюм болдурувда Къарабудагъгентни юзюм бавларыны тюшюмю аслам къошумун эте.

Гьали биз сапарыбызны аслу мурады – ерлерде юзюм гесивню барышы гьакъда сёз юрютейик.

Биринчилей, бизин районда тюгюл, республикада да алдынлы юзюмчюлюк хозяйство гьисапланагъан ООО Агрофирма «Герей-тюзню» юзюм тарлавларында болдукъ. Предприятиени ёлбашчысы Канзитдин Канзитдинов булан ишлени барышы гьакъда лакъыр этебиз.

- Канзитдин, негер буса да хошунг ёкъ, не болгъан, гьасиллер сен айтагъан кюйде тюгюлмю?

-Гьасиллерибиз чи яман тюгюл. Ишлеме, юзюм гесме адам гюч етишмей.

– Сизин коллективни ишчилери?

–Олар бар. Гёресиз чакъ нечик саллангъан. Гьалиде биз 45 гектар ердеги юзюмню «Молдова» журасыны тюшюмюн къайтарма тарыкъбыз.

Канзитдинни рагьатсызлыгъын ­англама ярай. Янгурлар тутуп къалса, кёп харж чыгъарып болдургъан тюшюм къолдан ­чыкъгъанны ким сюе.

Биз Канзитдин булан ишни гьакъында сёз узата туруп, тракторну артына тиркелген арба юзюм яшиклерден толуп сакълавгъа холодильниклеге салма къотарылма башлады. Предприятиени 400 тон юзюм, емишлер сыягъан холодилник складлары бар. Биз баргъан гюн агрофирманы коллективи юзюмюн сакълавгъа салмакъ учун жыйып тура эдилер.

Юзюм болдурувда топуракъда айрыча доланагъан ёлдашлар да аслам къошумун этелер.

Сапарыбызны барышында биз Магьамматали Алиевни тарлавунда да болдукъ. Мунда уллу жанланыв, юзюм гесивге хыйлы ишчи къуршалып иш юрюле. Биревлер юзюм гесе, оьзгелер юзюмден толгъан челеклени яшиклекге къотаралар. Узун сёзню къысгъасы, бары гюч тюшюмню тас этивсюз къолгъа алывгъа бакъды­рылгъан.

Сапарыбызны узата туруп, биз Гьасан Мамаевни юзюм тарлавунда да болдукъ.

Гьасан-дайи борлагъа, топуракъгъа къуллукъ этивде хыйлылагъа уьлгю гьисапда гёрсетме ярайгъан ёлдаш.

Бизге баянлыкъ береген кюйде, ону 4 гектарда юзюм баву бар. Борлагъа бары да агротехника къуллукълар сан янлы заманында этилгени гёрюлюп тура. Тюеклени боюнда, сыдыра араларында бир чёп отну гёрмейсен. Биз баргъан гюн Гь.Мамаев клиентге бермек учун юзюмюн гесип, яшиклеге тёшеп, «фуралагъа» юклеп тура эдилер. Тарлавну тюшюмю мол, хайырын гёрсюнлер.

«Къарабудагъгент юрт» муниципал къурулувну топуракъларында айрыча иш гёреген Ж.Алиевни, М.Гьайдаровну, Н.Салаватовну ва ­оьзге ёлдашланы юзюм бавларыны тюшюмлери де къуванчлы.

Районда буссагьатгъы вакътиде планлы кюйде тюшюм береген 1508 гектарда юзюмлюклер бар, ва шо участкаланы тюшюмлерини тас этивсюз къолгъа алма гьаракат этме тарыкъбыз.

Сентябр айны 28-не районда 1253 гектардагъы юзюмлюклени тюшюмю къайтарылгъан ва шо участкалардан 14571 тон юзюм алынгъан. Гьар гектаргъа гьисап этгенде 116,3 центнер бола.

Гьалиге юрт хозяйство предприятиелер – 4926 тон, КФХ-лар – 2500 тон, халкъ 7145 тон юзюм гесип сатывгъа чыгъаргъан, ишлетеген предприятиелеге бергенлер . Участкаларыбызны тюшюмю пуч болмай шулай къалса, районда бу йыл 16 минг тондан къолай юзюм жыйылма бола. Районда болдурулагъан юзюмню къадарына бу йыл плангъа гиреген 200 гектардагъы яш юзюмлюклер себеп.

«Тавакаллыкъ этмеген, шампан­ский ичмес» деп айтыв бар. Тек, буссагьатгъы вакътиде юзюмню багьа сатаман деп, артгъа сакълайгъан заман тюгюл. Кёпню умут этип, янгурлар тутуп, барындан да къуру къалагъан кюй болмасын. Гьали юзюмню къабул этеген, ишлетеген предприятиелер, оьзге алывчулар сатып алагъан багьалар, яман тюгюл. Чакъны ачыкъ гюнлерин уста кюйде къоллап , тюшюмню тас этивсюз къолгъа алмакъны гьайы этилсе, яхшы болур.