Меню
16+

Сетевое издание «Будни района»

10.07.2020 09:13 Пятница
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Ашлыкълар орула

Автор: Абдуллабек Самадов

Къакъашуралы айтылгъан механизаторубуз Сахават Алчагъыровну районда танымайгъанлар кёп аз бардыр. Ол оьзюн халкъгъа оьзюню къайратлы загьматы булан танытгъан. Айтагъаным, алда колхоз, совхозлар оькюрюп, авлакъларда иш къайнайгъан вакътилерден берли Сахават Алчагъыров – загьматны арышларына егилип гелген улан. Шо загьмат тёгеген къайдасындан бугюнлерде де алышынмайлы, Сахават юртунда далапчы гьисапда темир атындан тюшмейли юртлуларыны гесек топуракъларын сюре, ашлыкъ чача, ашлыкълар бишген заманда комбайнлары булан ашлыкъланы оруп да бере.

Муна, Сахават Алчагъыровну бу йылны тюшюмю учун чачылгъан 300 гектардан да къолай ерде ашлыкълары бар. Шону 52 гектары – арпа, къалгъан гектарлары буса будай. Шону тас этивсюз къайтармакъ учун ол 5 комбайны, саламны тайлагъа къысмакъ учун преслерин, ашлыкъ ташымакъ учун 2 автомашинни ремонтларын этип, алданокъ гьазирлеген. Алдагъы гюнлерде биз юрт хозяйство управлениясыны баш инженери Жамалутдин Акаевде булан бирче С. Алчагъыровну янында болдукъ. Бугюнлерде ол агьлюсюню уьюрлерини кёмеклиги де булан ашлыкъланы орувну къызгъын кюйде юрютюп тура эди. Июль айны 5-ине ерли олар 40 гектардагъы арпаларын оруп битдирип, саламын да тайлагъа къысып жыйып битгенлер. Ашлыкъ орув булан янаша Сахават гелеген йылны гьайын этип де юрюй. Гелеген йылны тюшюмю учун ол 110 гектар ердеги топуракъланы сюрюп гьазирлеген. Чакъны иссилигине, къургъакъ геливюне де къарамайлы, болдурулгъан ашлыкъланы, ону саламын тас этивсюз къайтармакъ учун Сахават уллу гьаракатда.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

3