Тюшюм учун ябушув юрюле

Мердешли тармакъны шо даражагъа етишдирме районда сугъарыв сувну, юзюм къабул этеген, сакълайгъан, сатывгъа чыгъарагъан логистика масъалалар мекенли чечилсе бары да имканлыкълар бар.

Авур шартлагъа да къарамайлы, артдагъы йылларда районда гьар йыл 100 гектардан къолай майданлагъа борла орнатыла.

Сугъарыв сувну масъаласы ёрукълу чечилсе, Манасгент, Къурбуки, Къарабудагъгент, Уллубийавул юрт муниципал къурулувларда юзюмлюклени майданларын генглешдиривде къолланмай къалып турагъан топуракълар, юзюмчюлюк булан машгъул болма сюегенлер аз тюгюл. Адамлар шартлар ёкъгъа гёре кёп харж чыгъарып борла орнатма тавакел этмей токътап тура.

Шогъар да къарамайлы буссагьатгъы вакътиде районда 2003 гектарда юзюм бавлар бар. Шо участкаланы 1226 гектары планлы кюйде тюшюм бере. 777 гектарда яш юзюмлюклер, 48 гектардагъы юзюмлюклер бу йыл планлы кюйде тюшюм берме башлажакъ.

Юзюм плантацияларда загьматны зангы оькюре. Ишчилер, механизаторлар мол тюшюм учун ябушув юрюте туруп борланы гьар бир къуллугъун агротехника гёрсетеген болжалларда сан янлы оьтгерилегени тарлавлагъа къарагъандокъ да гёрюне.

Ишчилер бугюнлерде мол тюшюм учун ябушув юрюте туруп яшыл байлав, чеканка этив ишлени давам этип туралар.

Касбучулар, КФХ-ны ёлбашчылары тюшюмню аврувлардан, зиянлы жанлардан къорув чараланы оьтгермекни гьайында. 3-нчю керен дарман урув тамамлана тура. Участ­каларына уьч керен дарман уруп битгенлери де бар. Тюекде тюшюмню гёрюнюшю де яман тюгюл.

Юзюмчюлеге мол тюшюм учун ябушув юрютювде лап тарыкълы зат юзюм тийишли даражада авурлукъ (налив) алсын учун участкаланы сугъарма сув тарыкъ. Ерли сувларыбыз булан бары да участкаланы сугъарма бажарылмай. Июль айны башында тюеклени сугъарма сув болмаса, юзюм тийишли авурлукъ алмай, бюртюк увакъ болуп къалажакъ.

Сугъарыв сувну масъаласын чечивде алда йимик гьалиде районну башчысы Магьмут Амиралиевни кёмеги тарыкъ. Осуз сугъарыв сувну масъаласын чечме бажарылмай. Юзюмлюклени сугъарма сув болса, къайтарыш къуванчлы болажагъына шекленме тюшмей.