Гезикли масъалалагъа къаралды

Гьали районда коронавирус инфекция аврувгъа байлавлу гьал ёрукълаша барагъаны гьис этиле. Июн айны 9-нда район администрацияда гьар жума оьтгерилеген аппарат чара болду. Чарада район администрацияны бёлюклерини ёлбашчылары, районну башчысыны 1-нчи орунбасарлары, юртланы башчылары ортакъчылыгъын болдурдулар. Шо гюнгю чараны ача туруп, районну башчысы М.Амиралиев районда коронавирус инфекция аврув булангъы гьалны суратлады. Ол оьзюню къысгъаракъ сёйлевюнде шо аврув билингендокъ, аврувну алдын алмакъ муратда мекенли къурумчулукъ иш юрюлгенни ачыкълашдырды.

Коронавирус инфекция аврувну алдын алывда, аврув къабунгъанланы сав этивде яллыкъ билмей, бары бажарывлулугъун салып чалышгъан районну медицина тармагъыны, районну ич ишлер бёлюгюню къуллукъчуларына, рагьмулу къолун узатгъан мецинантланы, волонтёрланы, юртланы башчыларына, юртланы имамларына, районну эсли халкъыны атына баракалла берди, разилигин билдирди.

Районну башчысы районну юрт хозяйство продукталар болдурувчулары, районну территориясында ерлешген савлугъун беклешдиреген лагерлени ёлбашчылары этген рагьмулу ишлени де эсгерди.

Чарада аслу доклад булан районну баш врачы Р.Гьиравов чыгъып сёйледи. Ону сёйлевюнден ачыкъ болгъаны йимик, буссагьатгъы вакътиде район больницада сувукъ тийген деп ятгъан 81 адам бар. Шоланы 5-синики ковид «положительный». Пандемия арагъа чыкъгъандан бу якъгъа 1822 аврув регистрация этилген, 142-си ковид, 726 пациент сав болуп чыкъгъан, шоланы 83 – ковид. 181 адам амбулатория къайда да аврувун сав этип туралар. Нечакъы гьаракат этсек де, гюч салсакъ да, 49 адамны оьлюмден сакълама болмадыкъ,- деди районну баш врачы Р.Гьиравов.

Чарада Россия Федерацияны конституциясына алмашынывлар, толумлашдырыв этивге тавуш берив гьакъда районну ТИК-ни председатели М.Алпанаев баянлыкъ берди.