Чачгъанлар сююне, чачмагъанлагъа гьаракат тарыкъ
Топуракъда доланагъан бай болмас, тек ач да къалмас деген сёзню ким айтгъан ва къачан айтгъан токъташдырма къыйын. Амма маънасы – тамуру теренлеге гетеген гьакъыллы айтыв. Мен оьзюм де шо сёзлени дуруслугъун ташдырма боламан. Мени ата-бабаларым, атам-анам топуракъ булан доланып гетгенге гёре, биз бай яшамасакъ да , бизин ожакъда яшавлукъ учун тарыкълы болагъан сурсат йылны бир заманында да кемимеген, ачлыкъны сезмегенбиз.
Мен бу калималаны эсгерегеним макътанып тюгюл, топуракъда доланагъан адам касипсиз яшама, харлысыз яшав къурма бола деме сюемен. Шо гьакъда кёп-кёп мисаллар да гелтирме боламан.
Артдагъы вакътилерде районда гёрюлген чараланы натижасында юрт хозяйство агьамияты булангъы топуракъланы ишлетив бир къадар яхшылашгъан. Мердешли юзюм, емиш бавларыбызны майданлары йыл сайын генглеше.
Адамны яшавунда ашлыкъ аслу ерни тута. Ондан къайры да будай къайсы девюрде де пачалыкъ агьамияты булангъы стратегия хаммал гьисапланып гелген. Дюньяны коронавирус инфекция аврув елеген девюрде рызкъыны (ашлыкъ) агьамиятлыгъы бир нече керенге арта.
Районда гюзлюклер чачывгъа тергев берилегени де негьакъ тюгюл. Йылдан-йыл ерлерде топуракъланы ишлетегенлени, сабан чачма гьаракат этегенлени санаву артып юрюй, бу гьал къувандырмай болмай.
Ондан къайры да районда гьайван-мал, тавукъ булан машгъул болагъанланы да санаву артып юрюй. Шоллукъда, тири, къатты емлеге талаплар да арта. Будайны, саламны багьалары гьали яхшы гётерилген. Бир кило будайны багьасы 16 манатдан, бир тай салам буссагьат 150-160 манатдан оьтген.
Емлеге бакъгъан талапланы артыву, багьаланы гётериливю сабанчыланы ругьун гётермей болмай.
Бугюнлер – гелеген йылны тюшюмю учун гюзлюк ашлыкълар чачып битеген заман. Тек чагъыбыз къургъакъ гелгенге гёре, ерлерде топуракъланы чачывгъа гьазирлевде къошум четимликлер тувулунду. Топуракъ къатты саялы, сюрюв ишлени барышы чаналашды, чачыв ишлер артгъа тебериле бара.
Районну юрт хозяйство тармагъыны касбучулары ташдырагъан кюйде, бу йыл гюзде 2021-нчи йылны тюшюмю учун 11664 гектар майдангъа гюзлюк къылчыкълы ашлыкълар чачма гёз алгъа тутулгъан. 7 минг гектаргъа ювукъ къылчыкълы ашлыкълар чачылгъан. Касбучулар билдиреген кюйде, гюзлюклер чачмакъ учун 11270 гектар сюрюлген топуракъларыбыз бар.
Артдагъы гюнлер районда яхшы дагьнилер болуп тура. Гюзлюклер чачып къутулгъан фермерлеге сююнме зат бар. Чачма хыял этегенлеге де пашман болма, талчыкъма зат ёкъ. Болгъан дагьнилер яхшы. Чакъ даим булай явуп турмас, ачылар. Амма чакъ ачылгъандокъ, бары гючню чачывгъа бакъдырма, гьаракат этме тюшежек. Шо саялы алданокъ урлукъланы, ягъарлыкъ, майлав материалланы запасын болдурса – яхшы болур.
Декабр айда чачылгъан гюзлюк ашлыкълардан да яхшы гелимлер алгъан йылларыбыз болгъан. Геч болгъан деп къоймай, чачмакъны гьаракатын этме тарыкъ.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
