Меню
16+

Сетевое издание «Будни района»

23.10.2020 10:09 Пятница
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Тергев бериле

Автор: Багьавутдин Самадов

Адатлангъан кюйде, гьар талатгюн районну администрациясыны аппаратыны генгеши оьтгериле. Шоллукъда, талатгюн, 20-нчы октябрде районну администрациясыны гезикли генгеши оьтгерилди. Генгешни ишинде район администрацияны управлениелерини ва бёлюклерини ёлбашчылары, районну ичиндеги юртланы башчылары оьзлени ортакъчылыгъын болдурдулар.

Гьаманда йимик, генгешни районну башчысы Магьмут Амиралиев ачды ва юрютдю. Ол Къарабудагъгент район больницаны баш врачы Расул Гьиравовну коронавирус инфекция аврув, оьзге инфекция ва ичек аврувланы гьакъында баянлыкълар бермеге трибунагъа чакъырды.

Трибунагъа гётерилген Къарабудагъгент ЦРБ-ни баш врачы Р.Гьиравов эсгерген кюйде, бугюн-буссагьат коронавирус аврув булан район больницада 7 адам ятгъан, оланы 3-юсю авур кюйде авруй.

Р.Гьиравону сёзлерине гёре, коронавирус инфекция яйылып, биринчи гюнлеринден башлап октябр айгъа ерли коронавирус ва пневмония аврувлардан районда умуми алгъанда 1840 адам авругъан. Оланы 58-и – гечинген. Къарабудагъгент ЦРБ-ни баш врачы Р.Гьиравов оьзге тюрлю инфекция аврувланы ва вакцина этивню гьакъында да маълуматлар берди. Масала, яшлар учун берилмеге тарыкълы грипден вакцинаны 30 проценти тюгюл берилмегенин айта туруп, шону да толу кюйде вакцина этилмегенин англатды.

Ачыкълашдырып айтсакъ, ДР-ни савлукъ сакълав министерлигинден яшлар учун гелген 10 минг дозаны 8364-сю этилинген. Яшлар шо вакцинадан бир зарал да гёрмегенин ол аян этди. Олай да, Р.Гьиравов грипден вакцинаны уллу адамлагъа этилгенлиги гьакъда эсгере туруп, шо 100 процент болгъанлыгъын айтды.

Оьзюню сёйлевюнде Къарабу­дагъ­гент район больницаны баш врачы залдагъыланы соравларына жавап бере туруп, анализлени жаваплары бираз алда жумалар-айлар булан къала эди буса, гьали 4-5 гюнден гелегенин англатды. Сонг да, коронавирусгъа къаршы этилеген вакцина 65 йылдан оьмюрю уллулагъа этилмеге гери урулгъанын ачыкъ этди.

Р. Гьиравов бугюн-буссагьат коронавирус инфекция ва ичек аврувлар булангъы гьал районда орта даражада экенин англатды.

Генгешни ахырында районну башчысы Магьмут Амиралиев ону гьасилин чыгъарып сёйледи. Демек, ол Роспотребнадзорну талапларын яшавгъа чыгъармакъны тапшура туруп, вирус ва оьзге аврувланы алдын алмакъ учун тийишли профилактика ва англатыв чаралар гёрмеге чакъырды.

Олай да, районну башчысы школаларда ва адамлар жыйылагъан ерлерде югъагъан ва оьзге тюрлю аврувланы гьакъында англатыв иш юрютмеге савлукъ сакълав идараланы къуллукъчуларына буйрукъ берди.

Оьзюню сёзюню ахырында районну башчысы М.Амиралиев идараларда ва къурумларда, олай да халкъ жыйылагъан ерлерде ва жамият транспортда маска гийив режимни къатты кюйде сакъламакъны тапшурду. Шо режимни бузагъанланы жавапгъа тартмагъа таклиф этди.

Олай да, ол юртланы ичиндеги орамланы ва ёлланы гьар тюрлю чёпден ва нас-алагъожадан тазаламакъны ва дезинфекция этмекни талап этди.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

4