Юртланы гёзеллиги арта

Районубузну бары да юртларында гюл бавлар, скверлер, оьзге ватандашлар ял алма болагъан майданчалар, тратуарлар пайдаландырывгъа берилген. Масъала 2021-2023-нчю йылларда муниципал къурулувну юртларында 31,7 миллион манатгъа жамият ерлер, гюлбавлар безендирилген. Мисалгъа гелтирейик, 2021-нчи йылда оьрде эсгерилип гетген федерал милли проектни рамкасында Аданакъ, Зеленоморск, Гьели, Агъачаул, ва Манасгент юртларда 11 миллион 400 минг манатгъа жамият ерлер, гюлбавлар безендирилген.

Федерал милли проектни узата туруп, 2022-нчи йылда шолай ишлер Къкъашура, Паравул ва Уллубийавул юртларда да жамият ерлер онгарылды ва безендирилди. Шо ишлеге 11 миллион 70 минг манат харжлангъан.

Районну ичиндеги гиччи юртлар да тергевсюз къалмай. Тарихге гетген 2023-нчю йылда ФКГС милли проект булан Ленингент, Жанга юрт­ларда жамият ерлени онгарывгъа, безендиривге 3 миллион 155 минг манат харжлангъан.

Этилген безендирив ишлени натижасында бизин районну ичиндеги юртланы гёрюнюшю гёзеллешген.

Чакъгъа исси тюшгени булан мили проект булан районну юртларында къурулгъан жамият майданчаларда ватандашлар агьлюлери, яшлары булан арив ял алма башлагъан. Юртларда онгарылгъан жамият майданчаларда гиччипавлар учун да онгайлыкълар болдурулгъан ва олар майданчаларда заманын къужурлу оьтгерелер.

«Артдагъы йылларда юртларыбызны гёзеллиги алышынгъан. Шогъар озокъда федерал милли проектлер булан ерлерде оьтгерилген безендирив ишлер болушлукъ этген. Районда 2024-нчю ва сонггъу йылларда да ФКГС-ни кюрчюсюнде юртларда жамият ерлени безендирив, къурув ишлер узатылажакъ», — дей районну башчысы ­Магьмут Амиралиев.