Англатыв ишлер оьтгериле
Буссагьатгъы вакътиде, оьзге ерлерде йимик, бизин районну юрт хозяйство тармагъыны къуллукъчулары да юрт хозяйство продукталар болдурувда, топуракъланы асувлу къоллавда къолда эте гелеген уьстюнлюклер гьукуматны янындан этилеген кёмеклерден, якълавлардан амалгъа гелген десек, янгылыш болмасбыз. Гертилей де, уьлкени башын тутгъан ёлдашлар юрт хозяйствону гётермек, продукталар болдурувну артдырмакъ учун гьар тюрлю тармакъларына этилеген акъча маяланы къадарын йыл сайын артдырагъанны гёребиз.
Районну юрт хозяйство управлениесини касбучулары, районну башчысы Магьмут Амиралиевни тапшурувуна гёре, районну муниципал къурулувларына барып, ватандашланы арасында ДР-ни юрт хозяйство ва сурсат министерлигинден таба топуракъда доланагъанлагъа не йимик кёмеклер этилегенни ва шо кёмеклерден нечик пайдаланма болагъаны гьакъда англатыв ишлер оьтгерив мердешге айлангъан.
Муна, март айны 29-нда УСХ-ны касбучулары, башында баш консультант С.Идрисов, ведущий касбучулары Гь..Гьажиев ва З.Арсланбеков ёлдашлар Гьели юртда болгъанлар.
УСХ-ны баш консультанты С.Идрисов жыйылгъанлагъа ДР-ни юрт хозяйство ва сурсат министерлигинден гёрсетилеген программаларда нечик ортакъчылыкъ этме болагъаны гьакъда мекенли кюйде англатывлар берген. Топуракъда доланагъанлагъа гьукуматны янындан этилеген акъча кёмеклерден толу кюйде пайдаланмакъ учун ерлерде юрт хозяйство потребитель кооператив къуруп, иш гёрме таклиф этген, СПоК-ланы гележеги барны англатгъан.
Англатыв ишлер оьтгеривню барышында топуракъланы регистрация этивде ва оьзге тарыкълы кагъызланы онгарывда тувулунагъан масъалаланы гётергенлер. Шолай ва оьзге тюрлю тувулунгъан соравлагъа ёлугъувну ортакъчылары мекенли ва тындырыкълы жаваплар къайтаргъанлар.
Шолай ёлугъувлар Къарабудагъгент, Дёргели юртланы ватандашлары булан да оьтгерилген. Ёлугъувлар узатыла.
Тарихге гетген 2021-нчи йылда районубузну юрт хозяйство продукталар болдурувчулары гьукуматны янындан 102 миллион манат субсидия ва грант акъчалар алгъан.
Юрт хозяйство производствону гётеривде юрт хозяйство продукталар болдурувчулагъа гьукуматны янындан этилеген кёмеклерден пайдаланмакъ учун биригип иш гёрсе, яхшы болур.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
