...доллар булан не аралыгъы бар?

Шоллукъда, гьакимликге артист, политикадан англаву ёкъ В.Зеленскийни украиналыланы авадан яны, демек, 70 процент­ден де къолайы ону кандидатурасын якълап, тавушларын бердилер. Шо да негьакъ тюгюл эди. В.Зеленский: “ЛНР-де, ДНР-де къалмагъалланы токътатма гьаракат этежекмен, Къырымны Украинаны табилилигине къайтаражакъман!”,- деген чакъырывлар, инандырывлар булан гьакимликге гелди.

В.Зеленский Украинаны Президенти болуп, биринчи йылынданокъ, нечесе юз йыллар булан дослукъда, татывлукъда яшап гелген Россияны ва ону халкъын сюймейгенин малим этди. Ол ачыкъдан-­ачыкъ Россиягъа ЛНР, ДНР-ни халкъларына къаршы оьзлени сиясат ёлун танглады ва юрютме башлады. Натижада Украинада милитарист-бандер гьаракат гючленди ва оьр гьакимлик къуллукълагъа гётерилди ва ачыкъдан-ачыкъ бизин уьлкеге къаршы гьаракат, миллетчилик терен тамурлар берип, славян халкъланы пешемейген болду, Россияны харлысызлыгъына туврадан-тувра гюч булан къоркъувлар берме башлады.

США, НАТО Украинаны 8 ­йылны боюнда харж, савут булан таъмин этип турагъанын савлай дюнья билсе де, къоркъунчлукъну алдын алмакъ учун бир чарада гёрюлмеди. Россияны Президенти В.Путин гьар-тюрлю чараларда шо гьакъда бир керен айтып къоймагъан, кёп керенлер айтгъан. Амма США-ны ва оьзге пачалыкъланы ёлбашчылары тувулунгъан гьалны ёрукълашдырма айланагъанны орнуна, ара бёлмей, Украинаны савутландыра, харж булан кёмек этип тура.

Февраль айны 24-нде Россияны Президенти В.Путин кёп ойлашып, уьлкебизни якълап, ЛНР-ни, ДНР-ни ёлбашчылары оьзлени харлысызлыгъын якъласын деп этген чакъырывуна гёре, Украинагъа Россияны савутлу гючлерини бир бёлюгюн гийирди. Бизин уьлкени ёлбашчыларыны аслу мурады 8 йылланы узагъында Украинадагъы тиши-тырнагъына ерли савутлангъан фашист-миллетчиликни якълайгъан, бизин уьлкени халкъыны аманлыгъына къоркъунчлукъ береген гюч­леге къаршы хас чаралар юрюле.

Бизге дос тюгюл уьлкелер Украинагъа савут булан кёмек этегенден къайры да, бизин уьлкеге гюч­лю ­санкциялар билдирилген. Тыш пачалыкълардан гелеген хаммал токъталгъан. Ягъарлыкъ, энергетика, газ Европа биржаларда бир токътавсуз гётерилип тура. Багьаланы гётериливю, билдирилген санкциялар биревге де пайда бермей.

Украинада къалмагъал башлангъандокъ, бизин республикада да сурсат продукталар себепсиз бирден гётерилип къалды. Далапчылыкъ булан машгъул ёлдашлагъа, увакълап сатыв юрютеген ёлдашлагъа: “Багьалар булай неге гётерилген?”,- деп сорагъанда: «Къарагъыз, доллар нечакъыгъа чыгъып бара»,- дей.

Биз долларны, еврону гётериливюн гёребиз. Дагъыстанда болдурулагъан юрт хозяйство продукталаны доллар булан не аралыгъы бар? Украинада къалмагъал башлангъанлы, уьлкеде ягъарлыкъ-майлав материалланы багьалары гётерилмеген. Уьстевюне, АЗС-лер де газ шо вакътиден бугюнге ерли 50 кепекге учуз болгъан.

Мен англайман, гьар-ким ожакъны юрютмекни гьайын этме тарыкъ. Далапчылар да оьзлени айланышындан бир-эки манатлар къазанма айланалар.

Амма, уьлкени бары да халкъына авур заманлар гелгенде картюшкени, согъанны, къапустаны, урлукъ майны ва оьзге сурсат продукталаны багьаларын шулай гётермек ярайгъан зат тюгюл.

Базарларда, сатыв-алыв точкаларда багьаланы ти­­­й­иш­сиз гётериливлени алдын алмакъ учун тийишли къуллукъланы янындан, мекенли чаралар гёрюлмесе, халкъны яшав гьалы дагъыдан-дагъы тёбенлешме бола...