Бары зат ананы къолундан башлана…
Алдагъы гюн, март айны 5-нде, Къарабудагъгент район администрацияны жыйынлар оьтгерилеген уллу залында Къатынланы Халкъара гюнюне багъышланып, «Бары зат ананы къолундан башлана...» деген байрам чара оьтгерилди. Озокъда, шо чарада оьзге заманларда йимик, концерт программалар, шатлыкълар болмады. Уьлкебиз учун къыйын заманлар, тас этивлер, къоркъунчлукъ биревню де тергевсюз къоймай буса да, Къатынланы Халкъара гюнюнде районну къатынгишилерин 8 Март булан къутлап, олагъа парахат яшав, яшларыны яхшылыкъларын гёрмеге, уланлары-эрлери дав чараларда ортакъчылыкъ этегенлеге сабурлукъ, оланы шатлыкъда къаршылама, олагъа уьйлерине эсен-аман къайтмакъ ёралды.
Чарада Къарабудагъгент районну башчысы, ону орунбасарлары, районну юртларындан чакъырылып гелген къатынгишилер, район администрацияны аппаратыны къуллукъчулары, бёлюклерини ёлбашчылары, район идараларда ишлейген къатын-къызлар ортакъчылыкъ этди.
Чараны сиптечилери ва къурувчулары Къарабудагъгент районну маданият ва туризм бёлюгю эди.
Жыйын оьтгерилеген зал къатынгишилеге, аналагъа, къызардашлагъа багъышлангъан стендлер, плакатлар ва выставка булан безенген эди.
Чараны ачгъан ону юрютювчюсю районну къатынларын 8 Март байрам булан къутлады, олагъа кёп яхшылыкълар ёрады. Къатынланы, аналаны атына кёп лайыкълы сёзлер айтды.
Инг башлап ол районну башчысы Магьмут Амиралиевге сёз берди.
-Гьюрметли районлу къатынгишилер ва аналар! Биз сизге гьар даим абур этебиз. Сизден айланагъа яхшылыкъ, рагьмулулукъ, гьай этивлюк, йымышакълыкъ ва сююнч яйыла.
Сизин арагъызда агьлюню гьайын этегенден, уьй ожакъны иссилигин сакълайгъандан къайры, жамият ишлерде ишлейген, Ватангъа къуллукъ этеген кёп къатынгишилер бар. Сиз намусланы авур янын да оьз инбашларыгъызгъа алгъансыз. Яшланы тарбиялав да, тюз ёлгъа салыв да сизин бойнугъузда деп айтсакъ, тюз болур.
Бугюнлерде, демек, дюньядагъы къыйын агьвалатланы вакътисинде сизин ортакъчылыгъыгъыз, якълавугъуз айрокъда гёрмекли. Сизин оюгъуз, гьакъылыгъыз, сюювюгюз бары да халкъгъа гюч ва ягь бере. Дюньядагъы бары да зат сизин сюювюгюзден, исси ана къолларыгъыздан башлана...
Сизин 8 Март – Къатынланы Халкъара гюню булан къутлай туруп, сизге кёп яхшылыкълар, насип, парахат яшав ва аманлыкъ ёрайман. Яшлары къыргъа гетгенлеге, узакъ къалмай шатлыкъда оланы къаршыламакъны, сююнчлю гюнлер ёрайман,- деди Магьмут Амиралиев.
Чараны барышында Россияны афгъанлы ветеранларыны союзуну Къарабудагъгент район бёлюгюню ёлбашчысы Татав Алиев, ДР-ни билим беривюню отличниги, РФ-ни умуми ва касбу билим беривюню гьюрметли къуллукъчусу, яшёрюмлени ат къазангъан насигьатчысы Умусалимат Бутаева, Къарабудагъгент районну къатынларыны Союзуну ёлбашчысы Гюлжанат Темирова, Губден школаны охув-тарбия ишлеге къарайгъан завучу, сынавлу муаллим Зулхужат Абдурагьманова залда олтургъан бары да къатынгишилени 8 Март байрам булан къутладылар. Олагъа дюньяны елеген пашман агьвалатланы вакътисинде савлукъ-саламатлыкъ, дав агьвалатларда ортакъчылыкъ этеген уланлары, эркъардашлары, уьягьлюлери эсен-аман уьйлерине къайтмакъны ёрадылар, къыйынлыкъ тюшгенлеге Аллагьдан сабурлукъ салмакъны тиледилер. Яшланы тарбиялавда аналагъа патриот ругьгъа айрыча тергев бермеге, агьлюге, ватангъа амин болмагъа уьйретмеге чакъырдылар.
Чараны барышында залда ортакъчылыкъ этген бары да къатынгишилеге роза гюллер савгъат этилди.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.