Тутушуп ябушувдан ярыш
30-нчу декабрде «Олимп» спорткомплексде Казим Жалиловну эсделигине багъышлангъан тутушуп ябушувдан республика ярыш оьтгерилди. Шо ярышда республикабызны 2 шагьарыны ва 3 районуну командалары оьзлени ортакъчылыгъын болдурдулар.
Турнирни башында журналист ва шаир Багьавутдин Самадов кёп йылланы узагъында Къарабудагъгент ДЮСШ-ни ёлбашчысыны къуллугъунда чалышгъан ва спортну оьсювюне оьзюню къошумун болдургъан Казим Жалиловну гьакъында генг кюйде малуматлар берди.
Олай да, оьтгерилген ярышны барышында район администрацияны физкультура ва спорт бёлюгюню ёлбашчысы Завур Умаракъаев, Казим Жалиловну къурдашлары, яшлары ва ол ябушмагъа уьйретген кочаплар сёйледилер. Олар оьзлени сёйлевлеринде К.Жалиловну атына макътавлу сёзлер айтдылар.
Ярыш ахшам гечсув тамамланды. Шо гюн оьтгерилген ярыш командаланы арасында юрюгенин эсгермеге тюше. Ярышны барышында кочаплар 10 тюрлю авурлукъларда гюч сынадылар. Ярышны оьр даражада юрютген судьялар чыгъаргъан гьасиллеге гёре, Магьачкъаланы командасы 1-нчи ерге ес болду. 2-нчи ерни – ерли кочаплар ва 3-нчю ерни буса хоншу къаягентли яшёрюмлер къазандылар.
Ярышны оьтгермеге «Джон транс» транспорт компанияны ёлбашчысы, сонг да Жамалутдин Умалатов, Камал Халилов ва Жалиловланы агьлюсю оьзлени кёмегин болдурдулар. Ярышда алдынлыкъны къазангъанлагъа дипломлар, медаллар, кубоклар ва акъча савгъатлар тапшурулду.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
