Шаир булан ёлугъув

Шоллукъда, март айны 20-нда Къарабудагъгент юртну баш китап­ханасыны сиптечилиги булан поэзияны Бютюндюнья гюнюне байлавлу болуп, шаир ва журналист Узлипат Ибрагьимова булан ёлугъув оьтгерилди.

Ачыкълашдырып айтсакъ, Узлипат Ибрагьимованы уьюне къонакълай районну тамазаларыны советини ёлбашчысы Абдулгьамит Мамагишиев, районну маданият ва туризм бёлюгюню ёлбашчысы Найида Мурзаева, юртну баш китапханачысы Азинат Пашаева ва шаир, журналист Багьавутдин Самадов бардылар.

Ёлугъувну башында маданият ва туризм бёлюкню ёлбашчысы Найида Мурзаева кёп йылланы боюнда «Районну яшаву» газетде журналист болуп ишлеген Узлипат Ибрагьимованы поэзияны гюню булан къутлады ва огъар къатты савлукъ ёрады.

«Узлипат Ибрагьимова – 10-дан артыкъ китапны автору, ол СССР-ни журналистлерини ва язывчуларыны союзларыны уьюрю, Дагъыстанны ат къазангъан маданият къуллукъчусу, газетлерде ва журналларда чыгъарылгъан минглер булангъы макъалаланы ва очерклени автору», — деп эсгерди Н.Мурзаева оьзюню сёйлевюнде.

«Узлипат Ибрагьимова оьзюню макъалалары булан кёп йылланы боюнда халкъны масъалаларын чечген. Ол маданият, жамият, экономика, тарбия, билим берив, савлукъ сакълав ва дагъы да башгъа тармакъланы гьакъында язгъан. Узлипатны атын савлай районну халкъы исси кюйде эсгере, газетде чыгъарылгъан ону маъналы макъалаларын ахтара. Уьйдеги заманында да оьзюню заманын Узлипат бошуна йибермей. Айтагъаным, огъар адамлар оьзлени масъалалары булан ёлугъа. Ол да оланы тюзевлю кюйде чечмеге кёмек эте», — дей ону гьакъында А.Мамагишиев.

«Узлипат Ибрагьимованы шиърулары къушну эки къанаты йимик: бириси – ону маъналы сёзлери, биревюсю – къолундагъы къаламы. Ону кёп шиъруларын къумукъ йыравларыбыз макъамлагъа салгъан ва йырлай. Узлипат Ибрагьимованы къайратлы ва гьалал загьматы гьукуматны янындан къыйматлангъан. Айтагъаным, огъар кёп тюрлю санавда дипломлар, грамоталар, орденлер берилген. Шаир Узлипат учун лап да уллу савгъат – оьзюню халкъыны сюювю ва абуру. Мени ­оьзюмню биринчи макъалаларымны ва шиъруларымны язагъанда Узлипат Ибрагьимовадан уьйренгенмен, илгьам алгъанман. Яратывчулукъ ёлума ону лап кёп таъсири болгъан», — деди шаир ва журналист Багьавутдин Самадов.

Оьтгерилген ёлугъувну барышында шаир ва журналист Узлипат Ибрагьимованы бир нече макъаласы гёзден гечирилди, ону шиъру китаплары гьакъында да айтылды.