Гележекни масъалаларына къаралды
Март айны 26-нда район администрацияны жыйынлар оьтгерилеген уллу залында администрацияны аппаратыны гезикли жумалыкъ жыйыны болду. Жыйында районну башчысыны орунбасарлары, администрацияны управлениелерини, бёлюклерини ёлбашчылары, юртланы башчылары, райцентрда иш гёреген къурумланы ёлбашчылары ортакъчылыкъ этдилер.
Чараны гиришив сёз булан районну башчысы Магьмут Амиралиев ачды ва юрютдю. Ол залдагъылар булан саламлашып битген сонг, шо гюн арагъа салынып ойлашылажакъ масъалаланы малим этди.
Март айны 26-нда болгъан администрацияны жыйынында Россия Федерацияны Президенти Владимир Путинни тапшурувун кюте туруп, РФ-ни Гьукуматы 2021-нчи йылны декабр айыны 1-нде къабул этген 2148-нчи буйругъуна гёре «Национальная система пространственных данных» деген пачалыкъ программаны районда яшавгъа чыгъыву ва территорияланы планлашдырывну схемасы арагъа салынып ойлашылды.
Бу масъалалагъа гёре районну мал-матагь ва топуракъ масъалаларына къарайгъан бёлюгюню ёлбашчысы Магьамматсолтан Халилов, районну баш архитектору Абдулла Гьажиев ёлдашлар гьисап берди.
М.Халилов оьзюню сёйлевюнде булай деди:
– Бу программаны яшавгъа чыгъыву топуракъланы, адамланы оьз еслигиндеги мал-матагьны, оьзге тюрлю объектлени санав платформагъа толумлашдырма, пачалыкъ кадастр багьасын токъташдырма болушлукъ эте.
Дагъыстан республиканы оператив штабыны къарары булан шо ишлени оьтгеривню, топуракъ гесеклени, оьзге объектлени есилерин, территорияланы ерлешген дазуларын токъташдырыв ишлени план-графиги тизилген.
Шо план-графикге гёре, Къарабудагъгент районда 2025-нчи йылны январ айыны 1-не ЕГРН-ге 190 территория зонаны ва 10 юртну дазуларын гийирме тарыгъын малим этди.
Докладчы оьзюню сёйлевюн узата туруп, буссагьатгъы вакътиде районда 54 территория зона ва юртну дазулары гиргенин ачыкъ этди.
Шо ишлер буссагьатда да узатылып тура. Демек, Къарабудагъгент, Уллубийавул, Паравул, Агъачавул юртланы ва Паравул юртда 20 территория зоналаны дазуларын гийирив тамамлана тура.
Росреестрни далиллерине гёре, алда гьисапгъа алынгъан тербенмейген объектлени санаву 27388 бар. Шону ичинде 3827 капитал къурулушлар (ОКС) 237 биналар, 23324 топуракъ участкалар.
План-графикге гёре алда токъташдырылгъан объектлени есилерин токъташдырыв чараланы оьтгерме тарыкъ. Савлай районда шолай объектлер 4488 бар. Буссагьатгъы вакътиге буса районда оьрде эсгерилген ишлер 2098 объектде оьтгерилгенин ачыкъ этди.
Чарада чыгъып сёйлеген районну баш архитектору Абдулла Гьажиев оьзюню сейлевюнде территория планлашдырыв – территорияны имканлыкъларын асувлу къоллавгъа, шону ичинде къурулушланы комплекс къайдада оьтгерив адамланы яшав даражасын яхшылашдырывгъа, гьалиги заманны талапларына жавап береген инженер, социал ва транспорт инфраструктураны , районну территориясында къурулуш объектлени къурувну ёрукълашдырма болушлукъ этегенин аянлашдырып сёйледи.
Оратор оьзюню сёйлевюнде районда топуракъланы къоллавну ва къурулушланы генеральный планы, ондан къайры да муниципал къурулувланы территория планлашдырывну схемасы онгарылгъанны малим этди.
Чарада оьзюню гьасил чыгъарып сёйлевюнде чарада арагъа салынып ойлашылгъан масъалаланы яшавгъа чыгъармакъ учун, юртланы башчыларын, жаваплы оьзге къуллукъчуланы масъалаланы районну гележек социал экономика масъалаларын яшавгъа чыгъарывда агьамиятлылыгъын англап иш гёрме чакъырды.
Ондан къайры да, районну башчысы Магьмут Амиралиев бизин районну территориясында ерлешген «Солнечный берег» деген яшлар ял алагъан лагерге Украина токътавсуз атышыв юрютеген Белгород областдан 400 яш гележегин малим этди ва администрацияны жаваплы къуллукъчуларына яшланы тийишли даражада къаршыламакъ учун лагерге барагъан ерлени онгарма, оьзге тарыкълы затланы болдурма тапшурувлар берди.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.