Меню
16+

Сетевое издание "Району яшаву"  «Будни района»

25.03.2022 10:30 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Китапланы байрамы

Автор: Нюрсагьадат Изамутдинова

Март айны 18-нде Къарабудагъгент район билим берив управлениени жыйынлар оьтгерилеген залында Яшлагъа багъышлангъан китапланы ва макъамланы жумалыгъыны ачылывуна багъышлангъан чара оьтгерилди.

Чараны сиптечилери, демек Къарабудагъгент Баш китапхананы яшланы бёлюгюню къуллукъчулары онда ортакъчылыкъ этмеге Къарабудагъгент юртдагъы яшлар бавланы гиччипавларын, школаланы охувчуларын чакъыргъан эди.

Олай да, яшлагъа багъышлангъан китапланы байрамында чакъырылып гелген районну маданият ва туризм бёлюгюню ёлбашчысы Найида Мурзаева, районну социал ва яшёрюм сиясат бёлюгюню ёлбашчысы Гюлжанат Темирова, яшлагъа багъышлангъан шиърулар язагъан ерли шаир ва журналист Насрулла Байболатов ортакъчылыкъ этди.

Зал тюрлю выставкалар, тамгазетлер ва башгъа тюрлю ва ярыкъ безенивлер булан чараны оьтгеривге арив гьазирленген эди.

Бары да жыйылгъанланы, инг башлап яшланы Къарабудагъгент районну Баш китапхана бёлюгюню ёлбашчысы Аминат Сотаева Яшлагъа багъышлангъан китапланы ва макъамланы гюню булан къутлады, оланы кёп охумагъа, тарбиялы болмагъа ва ёмакъланы рагьмулу игитлеринден уьлгю алмагъа чакъырды.

Сонг ол яшланы чарада ортакъчылыкъ этме гелген къонакълар булан таныш этди ва шатлыкъны узатмакъ учун ону юрютювчюсю, китапланы Бийкеси, Жамиля Фёдоровагъа сёз берди.

Байрам чараны юрютювчюсю де яшланы Китапланы байрамы булан къутлап, оланы байрам гюнню тарихи булан таныш этди.

Сагьнагъа гезик булан гётерилеген ёмакъланы игитлери оьзлени сагьналашдырывлары булан яман игитлеге оьзлени арасында ер ёкъну, оьзлер рагьмулу, яхшы ишлени кёп этмеге сюеген, бир-биревге кёмек этеген игитлеге къурдаш экенин ва шолайлагъа гьюрмет этегенин ­англатды. Олай да, къыйын­лыкъ тюшген ёмакъланы игитлерине ­оьзлени ерлерин тапма кёмек этди.

Залда олтургъан гиччипавлар ёмакъланы игитлери: «Золушка», «Буратино», «Красная Шапочка», «Кот в сапогах» ва башгъаларын уллу харсурувлар булан къаршылады. Сагьнагъа чакъырылгъан Къарабудагъгентдеги «Золушка» деген яшлар бавуну гиччипавлары залдагъылагъа оьзлени бек арив ва къужурлу бийивюн гёрсетди.

Къарабудагъгент гимназияны ва 1,2,3 номерли орта школаларыны охувчулары Китапланы гюнюне, билимлеге багъышлангъан шиъруланы гёнгюнден охуду. Олай да, охувчулар бугюнлерде Украинада оьтгерилип турагъан хас дав агьвалатларда ортакъчылыкъ этеген россиялы солдатлагъа, оланы къоччакълыкъларына багъышлангъан сагьналашдырывланы, тюрлю адабият монтажланы гёрсетди. Районну маданият Центрыны солисти Умия Амирова «Подари мне новую книгу» деген йырны йырлады.

Сёз берилген районну социал ва яшёрюм сиясат бёлюгюню ёлбашчысы Г.Темирова залдагъы яшланы Китапларыны байрамыны жумалыгъыны башланыву булан къутлады, олагъа шатлы ва парахат яшав ёрады.

Оьзлер учун Баш китапхананы къуллукъчусу Субайбат Гьажиева оьтгерген ёмакъланы игитлерине багъышлангъан викторинада гиччипавлар да, олар булан бирче охувчулар да актив кюйде ортакъчылыкъ этди. Викторинаны соравларына тез ва тюз жавап берген яшлагъа савгъатлар тапшурулду.

Сонг сёз берилген Къарабу­дагъгент 5 номерли орта школаны охувчулары яшлар учун язагъан шаир ва журналист Н.Байболатовну яратывчулугъу гьакъда хабарлады ва ону шиъруларын гёнгюнден охуду.

Сагьнагъа гётерилген шаир Насрулла Байболатов яшланы Китапланы байрамы булан къутлады, олагъа савлукъ, насип, ярыкъ кёкню тюбюнде къайгъысыз яшав ёрады. Сонг ол оьзюню янгы шиъруларын охуду.

Оьзлеге ювукъ, англама рагьат, яшлагъа багъышлангъан шаирни шиъруларына яшлар кёп сююп ва тергевлю тынгладылар.

Чараны тамамлай туруп, районну Баш китапхана бёлюгюню ёлбашчысы А.Сотаева ону актив ортакъчыларына грамоталар тапшурду, олай да яшланы жуманы ичинде китапханада гьар гюн оьтгерилежек чараларда ортакъчылыкъ этмеге чакъырды.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

2