Запаслар тергеле
Украина булангъы къалмагъаллар саялы, США-ны, Англияны оьзге Европа пачалыкъланы ёлбашчылары бизин уьлкеге ачыкъдан-ачыкъ экономика дав юрюте. Тыш пачалыкълар бизге къаршы гючлю санкциялар билдирген. Россия булангъы сатыв-алыв аралыкълар токътатылгъан. Доллар, евро токътавсуз гётериле.Украинадагъы гьалны Россиядан къайры ёрукълашдырма айланагъан дагъы гьеч бир пачалыкъ да ёкъ. Уьстевюне США, Англия, НАТО Украинаны бир токътавсуз савут булан таъмин эте.
Шоллукъда парахат яшав сюреген халкъ языкъ. Украинаны Савутлу Гючлери, националистлер, юртланы социал объектлерине атыша, буза. Гьакъыкъатда буса ялгъан далиллер булан: “Россияны асгерлери халкълар кёп жыйылагъан ерлеге, сациал объектлеге ракеталар булан ура”,- деп бары айыпны Россиягъа сала.
Россияны Савутлу Гючлери парахат халкъны къырма, шагьарлагъа урма сюе болгъан буса, бизин асгерлер миллетчилер, террористлер булан юртеген хас чарагъа тезден ахыр салма болар эди.
Къалмагъал башлангъандокъ базарларда, сатыв-алыв точкаларда бары затны багьалары бирден гётерилген. Айрокъда сурсат продукталаны багьалары эки керенге артгъан. Шоланы арасында адамлар гьар гюн къоллайгъан продукталар: урлукъ май, шекер, къапуста, къызыл чита ва оьзгелери. Бу продукталаны валюта булан не аралыкълары бар? Булар барысы да бизин топуракъларда оьсе чи. Далапчылыкъ булан машгъул ёлдашлагъа, гьалдан пайдаланып, багьаланы шунча шулай гётерме тюшмей эди. Дагъыстан намус, языкъсыныв къайда гетген?
Районну ёлбашчылары багьаланы себепсиз гётериливюн гьисапгъа алып, районну муниципал къурулувларында сурсат продукталаны запасларын тергевню тюбюнде сакълап тура.
Алдагъы гюн районну юрт хозяйство управлениесини баш агроному М. Абдулвагьабов, ведуший касбучусу Гь. Гьажиев ёлдашлар Къакъашура юрт муниципал къурулувну касбучулары булан бирликде юртда сурсат продукталаны запасларын тергеп чыкъгъанлар.
Тергевлер исбат этеген кюйде, Къакъашура юрт муниципал къурулувда аслу сурсат продукталаны запасы болдурулгъан ва олар увакълап сатыв юрютеген точкаларда сатыла. Масала, юртда къапустаны, картюшкени, согъанны, дюгюню, унну запаслары бар. Емишлени къадары кёп тюгюл, тек аз буса да бар.
Муниципал къурулувда аш биширеген 3 пекарня ишлей. Умуми алгъанда оларда 30 тондан къолай ун бар. Буссагьатгъы вакътиде юртда ашны багьасы гётерилмеген деп билдире. Сурсат продукталаны запасларын маниторинг этив районну оьзге юртларында да оьтгерилежек.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
