Яшёрюмлени арасында ярышлар

Шоллукъда, февраль айны 22-нде ДОСААФ-ны Къарабудагъгент спорт-техника клубуну «Зилбили» майданчасында оьрде эсгерилген ярышлар оьтгерилди. Ярышларда районну ичиндеги бары да школаланы вакиллери оьзлени ортакъчылыгъын болдурду.

Инг башлап военизированный кросда ортакъчылыкъ этмек учун гелген командалар майданчагъа тизилдилер. Олар тизилип битген сонг, ярышны шатлы бёлюгю башланды.

Ону юрютювчю район газетни баш редакторуну орунбасары Багьавутдин Самадов ярышланы ортакъчыларына, тренерлеге, чакъырылып гелген къонакълагъа ва судьялагъа чараны оьр даражада оьтгермеге чакъыргъан сонг, яшёрюмлеге уьстюнлюклер ёрады.

Сонг сёз берилген районну ветеранларыны советини ёлбашчысы, ДР-ни ат къазангъан физкультура къуллукъчусу, кёп йылланы узагъында райондагъы автошколаны ёлбашчысы болуп ишлеген Имамутдин Жалилов ярышланы ортакъчыларына оьрлюклер ёрай туруп, оьтгермеге кёмеклешген ва къолун узатгъан районну ва юртну администрацияларыны ёлбашчыларына, олай да, Гьалимовланы агьлюсюне баракалласын билдирди.

Олай да, ол оьзюню сёйлевюнде Агъалав Абдуллаевич Гьалимовну яшав ва загьмат ёлларын эсгерди. Демек, Агъалав Гьалимов районну билим берив, маданият, спорт, эл-ахтарыв, тарих ва оьзге тармакъларына кёп уллу къошумун этгенин бизге унутмагъа ярамай. Шолай адамланы эсделигине гьар тюрлю чаралар оьтгермеге тийишли.

Сёз берилип сёйлеген Агъалав Гьалимовну уланы – Уллубий оьзюню атасыны атын эсгерип, булай чаралар ва ярышлар оьтгереген Къарабудагъгент районну админис­т­рациясына ва районну билим берив управлениесине, сонг да ДОСААФ-ны Къарабудагъгент СТК-сыны коллективине баракалласын билдирди.

Сёйлевлерден сонг юрютювчю Б.Самадов ярышланы ачмакъ учун РФ-ни пачалыкъ байрагъын гётермеге 2021-нчи йылда оьтгерилген военизированный кросда алдынлы ерлени алгъан школаланы вакиллерин чакъырды. Шоллукъда, Къарабудагъгент 2 номерли ва Гьели орта школаланы яшёрюмлери байракъны гётердилер.

Шо гюн оьтгерилген ярышларда, къабул этилген хас положениеге гёре, ярышны ортакъчылары уланъяшлар 2 минг метрге, къызъяшлар буса 1500 метрге крос чапдылар. Сонг да олар чапгъан гьалда гранатны ташладылар. Олай да олар гьава тюбекден нишангъа атышдылар.

Оьтгерилген ярышны судьялар чыгъаргъан гьасиллерине гёре, шу яшёрюмлер ва командалар алдынлы ерлеге ес болдулар.

Командаланы арасында: 1-нчи ерге Къарабудгъгент 2 номерли орта школа ес болду. 2-нчи ерни гимназия къазанды, 3-нчю ерни буса Гьели орта школаны умуми командасы.

Уланъяшланы арасында:

1-нчи ер – Гебек Гебеков (Къарабудагъгент 2 номерли орта школа). 2-нчи ер – Омар Магьамматов (Губден орта школа), 3-нчю ер – Къурбан Алиев (Гьели орта школа).

Къызъяшланы арасында:

1-нчи ер – Гюлбике Ягьияева (Къарабудагъгент 2 номерли орта школа), 2-нчи ер – Женнет Алхасова (Къарабудагъгент 2 номерли орта школа), 3-нчю ер – Рапият Ягьияева (гимназия).

Ярышланы онгаргъанлагъа ва ­оьтгергенлеге разилигибизни ва баракаллабызны билдиребиз. Яшёрюмлер учун шулай спотрт масс чаралар лап да пайдалы.