«Тамаша космос»
Белгили кюйде, 12-нчи апрель – космонавтиканы гюню, демек биринчи адам космосгъа учгъангъа багъышлангъан байрам. Шо байрам гюнню савлай дюньяда белгилей, охув ожакъларда, яшлар бавларында байрамгъа багъышланып тюрлю чаралар, ачыкъ дарслар, тюшюнюв сагьатлар оьтгериле.
Апрель айны 3-нде Къарабудагъгент 2 номерли «Юлдуз» яшлар бавуну уллу гюбюню тарбиялавчусу И.Вагьитова оьзюню тарбияланывчулары учун космонавтиканы Халкъара гюнюне багъышлап «Тамаша космос» деген ачыкъ дарс оьтгерген.
Ачыкъ дарсны барышында школа чагъына етишмеген яшлар планеталаны ва оланы спутниклерин, гьатта Гюнню ва юлдузланы ахтарып, оланы гьакъында яхшы билмек учун ою булан (мысленно) тамаша космосгъа сапар чыкъгъанлар.
Сонг да гиччипавлар тарбиялавчусуну кёмеги булан «Космос савутну ичинде», «Венерада вулкан атыв» ва «Космос янгур» деген экспериментлени оьтгерип, бек тамаша болгъанлар. Космонавтиканы гюнюне багъышланып оьтгерилген дарсында тарбиялавчу И.Вагьитова яшлагъа савлай дюньяны биринчилей «Восток» деген космос гемеде 1961-нчи йылны апрель айыны 12-нде совет космонавт Юрий Гагарин айлангъаны ва ону космосдан эсен-аман къайтывун халкъ нечик къаравуллагъан болгъаны гьакъда хабарлагъан. Тарбиялавчуну хабарларына яшлар иштагьлы тынглагъан.
Шолайлыкъда, ачыкъ дарс яшлар учун бек пайдалы ва къужурлу оьтген. Дарсны ахырында эсделик суратлар да чыгъарылгъан.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
