Шарапутдин – Россияны чемпиону
Гюнагьларындан Аллагь гечсин, паравуллу, уллуланы арасында авур атлетикадан дюньяны эки керен чемпиону, Алимагьаммат Изиев Паравул юртда спортну бу журасына къатты кюрчю салып, оьсюп гелеген яш наслуну авурлукълар гётеривге яхшы иштагьын, ругьун гётерип гетген.
Алимагьаммат Изиев оьзюню заманында тарбиялагъан, авур атлетикагъа иштагьын уятгъан яшланы арасында кёплери гьар тюрлю ярышларда гёрмекли уьстюнлюклеге етишгенлери, тренер болуп яшланы спортну авур атлетика журасына уьйретеген ва олар тарбиялагъан кочаплар ярышларда яхшы натижалар гёрсетип юртлуларын, савлай районну халкъын сююндюрелер.
Расул Темирбеков – Алимагьаммат Изиев тарбиялагъан, авур атлетикагъа сюювюн сингдиргенлени бири, А.Изиевни ёлбашчылыгъыны тюбюнде Р.Темирбеков авур атлетикадан оьзюню авурлугъунда Дагъыстан, СКФО ярышларда гёрмекли уьстюнлюклеге етишме бажаргъан кочап.
Расул Темирбеков «Ат туягъын, тай басар» дегенлей, оьзюню тарбиялавчусуну ишин давам эте. Тренер болуп юртлу яшланы авурлукълар гётеривню къайдаларына, низамына уьйрете. Гьар гюнлюк къаныгъывлу тренировкалар, тренерни бажарывлу гёрсетивлери, насигьатлары яшларда инамлыкъ тувдура ва олар ярышларда алдынлы ерлени алып къайталар.
Гьали-гьалилерде Дагъыстанда авур атлетикадан биринчиликни алмакъ учун оьтгерилген ярышларда, Р. Темирбековну 7 тарбияланывчусу гёрмекли ерлени къазанып, Россия чемпионатында ортакъчылыкъ этме ёл ачдылар.
Март айны ахыр гюнлеринде Оренбург шагьарда авур атлетикадан Россияда биринчиликни алмакъ учун ярышлар юрюлдю. Расул Темирбеков тарбиялагъан, оьсдюрген 6 кочап шо ярышларда ортакъчылыкъ этме гьазирлене эдилер.
Муна Оренбург шагьардан сююнч хабар гелди. Р.Темирбековну тарбияланывчусу Шарапутдин Изиев ярышланы биринчи гюнюнде 49 кило авурлукъда 15 йылгъа етишгинче яшёрюмлени арасында алтын медалгъа ес болгъан. Шарапутдин «рывокда» -70 килону гётерген, «толчокда» 87 килону енгген. Шоллукъда, Шарапутдин Изиев, ярышларда умуми алгъанда 157 килограм авурлукъну гётерип, Россияны чемпиону деген оьр атгъа ес болгъан.
Яш кочапгъа бу гёрмекли уьстюнлюк. Шарапутдин Изиев, ярышларда гёрмекли натижаланы къолда этип, районубузну атын данггъа гётерди.
Районну башчысы Магьмут Амиралиев Шарапутдин Изиевни ва ону тренери Расул Темирбековну оьр уьстюнлюгю булан къутлагъан ва гележек ярышларда да алдынлыкъ алып къайтма насип ёрагъан.
Районну башчысыны къутлавларына районну бары да спортгъа иштагьлылары къошулалар ва гележек ярышларда да уьстюнлюклер ёрайлар.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.