Эл намусун кюте

Шо гьакъда айта туруп, Къакъашуралы Камил Къайирбеков да бир де къайпанмагъан гьалында оьзюню алдына салынгъан асгер тапшурувланы намуслу кюйде кютюп гелегенин айрыча эсгермеге тюше.

Камил Пашаевич Къайирбеков 1984-нчю йылда 13-нчю июльда Ставрополь крайны Старо-Дворцовский деген гиччи юртунда тувгъан. Шондан сонг узакъ къалмай муну агьлюсю ата юрту Къакъашурагъа къайта. Ол ата юртундагъы 1 номерли школа 9 класны битдирген сонг, ПТУ-да да охугъан. Охуву тамамлангъан сонг Камил Ватанны алдындагъы борчун кютме армиягъа гете. Асгерде гьалал къуллукъ этип къайт­гъан улан 6312-нчи дав бёлюк­де дыгъар байлап санитар къуллукъда машин гьайдавчу болуп ишлей.

К.Къайирбеков хас дав чара билдирилип биринчи гюнлеринден тутуп, демек 2022-нчи йылны февраль айыны артдагъы гюнлеринден башлап хас дав чарада ортакъчылыкъ эте. Шо заманны узагъында Камил оьзю къуллукъ этеген бёлюкню ёлбашчылары алгъа салгъан борчланы къоччакъ, бажарывлу кюйде кютюп, оланы разилигин къазанып юрюй ва бугюнлерде де санитар къуллукъдагъы жаваплы ишин юрюте.

Дав майданларда гёрсетген бажарывлулугъу, къоччакълыгъы ва онда яралангъанланы оьлюмден къутгъаргъаны саялы, К.Къайирбеков Жуковну ордени булан савгъатлангъан.

Озокъда, бизин игит уланларыбыз савгъатлар учун тюгюл, парахатлыкъ­ учун ябушгъаны барыбызгъа да белгили. Биз де тюзлюк учун ябушув юрютеген воинлерибизге уьстюнлюк ва ожакъларына эсен-аман къайтмагъа насип ёрайбыз.