Девюрлени ялгъав байлаву

Гьар йыл март айны 10-нда уьлкебизде Архивлени гюню белгилене. Шо касбу байрамгъа багъышланып тарих-ахтарыв музейде «Времён связующая нить» деген баш булан архив документлени выставкасы къурулгъан. Выставка Къарабудагъгент район муниципал архив булан бирче гьазирленген. Выставка районда 1940-1942-нчи йылланы биринчи хозяйстволукъ китапланы ва оьзге документлени копияларындан къурулгъан.

Март айны 22-нде буса эсгерилген музейде Архивлени гюнюне багъышланып чара оьтгерилген. Музейни заведующийи Х.Алиева гелгенлени архив къуллукъну тарихи булан таныш эте туруп, архивни къуллукъчуларыны иши гьар юртну тарихи, маданияты гьакъында лап герти маълуматланы сакълавда инг агьамиятлы ерни тутагъанны эсгерди. Эсгерилген чараны къонакълары – Муниципал архивни ёлбашчысы М.Гьажиев, ону орунбасары Б.Мамаева ва Муниципал архивни баш касбучусу Н.Лабазанова чарада ортакъчы­лыкъ этген охувчулар булан тюшюнюв лакъырлашыв оьтгердилер. Олар оьзлени сёйлевлеринде архив документлер де элибизни тарих ва маданият варислигини бир гесеги экени гьакъда англатыв бердилер.

Шо маъналы лакъырдан сонг яшлар учун выставканы обзору оьтгерилген. Сонг да, чараны ахырында охувчу яшлагъа муниципал архивге экскурсиягъа барма имканлыкъ берилген. Мунда Б.Мамаева ва Н.Лабазанова оланы архив къуллукъчуланы иши булан таныш этген. Охувчулар оланы хабарына иштагьы булан тынглагъан ва архив документлер сакъланагъан ерге бек агьамиятлы кюйде къарап чыкъгъан.