Ёлугъув оьтгерилди
Белгили кюйде, Россияны къысматына, гележегине гьайлы кюйде янашагъан, патриот ругьу булангъы къоччакъ уланларыбыз уллу уьлкебизни янгы топуракъларында миллетчиликге къаршы хас дав чара юрютегени 2 йылдан да къолай бола. Бир де къопдурувсуз айтгъанда, оланы къайсы да Ватаныны алдындагъы борчун намуслу кюйде кютюп, берген антына амин болуп, дав майданларда игитликлер гёрсетип, оьзлени бир де аямайлы, оьзгелеге де уьлгю болардай ябушалар.
Хас дав чарада ортакъчылыкъ этегенлени арасында бизин районну Гьели юртундан гетгенлер де аз тюгюл. Шоланы бириси – Агьматпаша Ражабович Агъаев. Ол хас дав чарагъа биринчи гюнлеринден берли мобилизация булан къуршалгъан ва бугюнлеге ерли игит кюйде, оьзюню лап яхшы якъдан гёрсетип къуллукъ эте. Къолуна тийген авур ярасына ва этме герекли операциясына да къарамайлы, Агьматпаша асгерлик къуллугъун узатып тура.
Алдагъы гюнлерде, март айны 22-нде, Гьели школаны 9-11-нчи класларыны охувчулары ва клас ёлбашчылары, Агьматпаша Агъаевни къысгъа болжаллы отпуска булан уьюне гелгенлиги булан пайдаланып, ону булан ёлугъув оьтгергенлер.
Ёлугъувну барышында яшлар асгер къуллукъчуну солдатланы дав майданлардагъы яшаву гьакъдагъы хабарларына бек агьамиятлы тынглап, сонг буса оьзлени соравларын бермеге болгъан. Олар Агьматпаша Агъаевге ва ону дав ёлдашларына къатты савлукъ, аманлыкъ ва уьстюнлюкню де къазанып тезлик булан эсен-аман агьлюлерине къайтмакъны ёрагъан.
Агьматпаша ата юртуна гелип, уьягьлюсю ва эки де авлетини янында, 2 жума тургъан. Тек не амал, 24-нчю мартда ол асгерлик къуллугъун давам этмек учун оьзю къуллукъ этип турагъан дав бёлюкге къайтара гетген.
Биз де Ватаныны алдындагъы борчун намуслу кютеген Агьматпашагъа эсенлик-аманлыкъ, ва хас дав гьаракатда уьстюнлюк ёрайбыз.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
