Яшланы чыныкъдыра ва тарбиялай

Алдагъы гюнлерде Къарабудагъгентдеги спорт школаны директору редакцияда къонакълыкъда болду. Ону булан биз спорт школада спорт масса ишлени салынгъан кююню, тарихини, школаны кочапларыны уьстюнлюклерини айланасында сёз юрютдюк.

Райцентрда яшланы спорт школасы ачылгъан сонг, юртну оьсюп гелеген яш наслусуну арасында спортгъа иштагь­лыкъ бирден-бир гётерилди, юртлу яшлагъа оьзлер ушатагъан спорт булан машгъул болма, тренировкалар этме, гьар-тюрлю оьлчевдеги ярышлагъа гьазирленме ва ортакъчы­лыкъ этме имканлыкълар артды. Оьтген девюрню ичинде спорт школада кёп къадарда спортну гьар тюрлю жураларындан ­Дюньяны, Европаны, Россияны, СКФО-ну, Дагъыстанны чемпионлары, призёрлары тарбиялангъан. Масала, спорт школаны 10 тарбиялавчусу дюнья оьлчевдеги ярышларда алдынлыкъны алып, Дюньяны чемпиону деген атгъа ес болгъан. Ондан къайры да, спорт школаны бир кочабы Азия ярышланы чемпиону болгъан.

Къарабудагъгентдеги яшланы спорт школасында спортну 10 тюрлю журасындан секциялар ишлей. Шолагъа 700-ге ювукъ яш къуршалгъан ва, оьзлер танглагъан спортну журасындан пагьмусун, усталыгъын артдырмакъ учун, сынавлу тренерлени ёлбашчылыгъы, гёрсетивлери булан спорт усталыгъын артдырмакъны уьстюнде къаныгъыв­лу кюйде ишлеп туралар.

Спорт школада спортну гьар тюрлю жураларындан 28 тренер яшланы тарбиялав булан машгъул. Райцентр­дагъы школагъа Агъачавул да гире.

Бугюнлерде спорт школаны тарбиялавчулары уьлкебизни гьар тюрлю регионларында оьтгерилеген Россия оьлчевдеги ярышларда ортакъчылыкъ этип туралар. Масала, авур атлетикадан Оренбург шагьарда юрюлюп турагъан Россия чемпионатында Дагъыстанны жыйым командасыны сыдраларында бир кочабы ортакъчылыкъ эте. Ондан къайры да, уьлкебизни тахшагьары Москва шагьарда тутушуп ябушувдан оьтгерилеген Россияны первонствосунда 3 тарбиялавчусу ортакъчылыкъ этелер.

Къарабудагъгентдеги спорт школаны тарбиялавчулары спортну ушу-саньда журасындан гьар-тюрлю оьлчевдеги ярышларда къолда эте гелеген уьстюнлюклери гёрмекли ва шо гьакъда газетни бетлеринде макъалалар берилген. Муна, бугюнлерде де Москва шагьарда спортну ушу-саньда журасындан Россияда биринчиликни алмакъ учун юрюлеген ярышларда школаны 8 тарбиялавчусу ортакъчылыкъ эте.

Къарабудагъгентдеги яшланы спорт школасында тарбияланып чыкъ­гъан яшланы кёплери гьали профессионал турнирлерде ортакъчылыкъ эте, яхшы натижаланы гёрсете гелегенлери де аз тюгюл.

Спортшколаны директору Магьамматдагьир Исрапилов ва тренерлер школада спортгъа уьйретип къоймай, оланы къы­лыкъ, ругь якъдан тарбиялавгъа, наркотиклени ва оьзге яшны савлугъуна зиян этеген затланы гьакъында да, тренировкалардан сонг жыйылып, ачыкъ лакъыр юрютегенин де яшырмадылар.

Лакъырны барышында спорт школаны материал-техника базасы гьакъда да сёз юрюлдю. Кант ёкъ. Айрокъда, спорт школа «Олимп» спорт комплексге къошулгъан сонг, материал-техника базасы дагъыдан-дагъы яхшылашгъанны ачыкълашдырдылар.

Бу макъаланы онгарма гьазирленегенде, район газетни баш редактору А.Гьажиев булан биз «Олимп» спорт комплексде болдукъ. Шо гюн эки залда, бирисинде тутушуп ябушувдан, бирисинде дзюдодан тренировкалар юрюлюп тура эди. Гиччипавлар жут-жут болуп тренерни тергевюню тюбюнде усталыгъын камиллешдирип тура эдилер.

Озокъда, спорт булан машгъул болгъанланы барысы да Олимпиада оюнланы, Дюньяны, Европаны чемпионлары болмаса да, къаркъарасы жыйнакълы, къатты савлугъу булан оьсежегине шеклик тувдурмай.

Чинкдеси, спорт яшны эдепли, уллугъа абур, гиччиге гьюрмет этивню ругьунда тарбиялама болушлукъ этегенин бирев де инкар этмес.