Россиялыланы юреклери сызлады

Рагьмусуз терактны натижасында 140 адам оьлген, оланы арасында яшлар да бар деп билдириле, гьалиге оьлгенлени 120-сы кимлер экени мекенлешдирилген. Зараллангъанланы санаву 360-гъа етишген шоланы 11-и яшлар. Тек бу санавлар гьар гюн мекенлешдириле, демек алышына. «Крокус Сити Холл» концерт залны бинасы толу кюйде яллап битген, демек бина янгыдан къурулмаса болмайгъан гьалда.

Озокъда, болгъан вагьши теракт биревню де тергевсюз къоймады. Бир гюнагьсыз, ял алма концертге гелген ватандашлар къырылды, яраланды, заралланмагъанларына да психология кёмеклер та­рыкъ. Аз заманны ичинде олар гёрген къоркъунчлукъ, озокъда, натижасыз къалмайгъаны белгили.

Дагъыстанны халкъы теракт не зат экенни яхшы англай, нече-нече терактланы гёрген, аявлуларын тас этген. Каспийск, Магьачкъала, Къызлар, Буйнакск шагьарларда, Чиркей, Къарабудагъгент, Губден юртларда ва башгъаларында болгъан те­рактлар Дагъыстанны халкъыны эсинден таймагъан, шо гюнлер бугюнде де гёз алгъа геле. Бугюн биз Москва областда болгъан вагьши террорчулукъну натижасында жан бергенлеге къыйналабыз, зараллангъанлагъа языкъсынабыз, террорчуланы – налатлайбыз.

Дос-къардашын, ювукъларын тас этгенлеге теренден къайгъырышабыз, оьзлер булан бирче къыйналагъаныбызны билдиребиз. Террорчулагъа къаршы экенлигибизни айтабыз, олар инг де гючлю ва къатты кюйде такъсырланма герегин якълайбыз. Ватандашланы жанын къыйгъан, уллу заралланывлагъа тарытгъан террорчулар оьзгелеге дарс болурдай такъсырланма тарыкъ!

Болгъан терактгъа гёре, РФ-ни Президенти В.В.Путин россиялылагъа 23-нчю мартда сагьат 3-де чакъырыв этди.

Инг башлап ол Красногорскда болгъан къанлы терактда къардашларын ва ювукъларын тас этгенлеге теренден къайгъырышагъанын билдирди.

«Крокус Сити Холл» деген концерт залда болгъан вагьши теракт­ны натижасында кёп оьлгенлер ва зараллангъанлар барны айта туруп, яралангъанлагъа врачланы, гьукуматны янындан тарыкъ чакъы кёмек этилежегине инандырды.

“Къайгъы бирдагъы керен россиялыланы бирлешдирди. Болгъан къанлы теракт биревню де тергевсюз къоймады. Гьар адам оьзюню кёмегин, гьар касбучу бар гючюн салып оьзюнден болагъан якълавну этмек муратда чабып айлана…

Иш этип, кёп заманны узагъында гьазирлик гёрюп, ватандашланы оьлтюрме гелген террорчулар къатты кюйде такъсырланажакъ!

Тезликде иш гёрювню натижасында 4 терорчу тутулду. Оланы Украина бойлагъа багъып къачма этген гьаракаты бажарылмады. Террорчулагъа кёмеклешгенлер де тутулгъан ва тутулажакъ. Терактны этме буюргъанлар да узакъ къалмай белгили болажакъ! Оланы гьарисине тюз такъсырланыв этилежегине мен сизин бирдагъы керен инандыраман…

Россия кёп къыйынлыкъланы гёрген, бек авур гьаллардан чыкъгъан. Тек россиялылар гючлю болса тюгюл, бир заманда да осал болмагъан. Гьар къайгъылы агьвалат Россияны халкъына гюч берген. Гьали де шолай болажакъ!” – деген ол.

Сёйлевюню ахырында В.Путин март айны 24-ю – савлай Россияда бары да миллетлеге ортакъ къайгъылы гюн деп билдирди.

Болгъан терактны натижасында оьлгенлеге къайгъырмагъан бирев де къалмагъандыр!? Бир гюнагьсыз оьлюп гетген адамлагъа къыйналмай боламы?!

Дагъыстанлылар Москвада «Крокус Сити Холл» концерт залда болгъан терактда жан бергенлени эсделигине багъышланып оьтгерилген «Летят журавли» деген гьаракатны якълады. Магьачкъаладагъы телевизионный башняда «Скорбим. 22.03.2024» деген язывлар учагъан акъ турналар булан алышынып гёрсетилип турду.

Тек «Шолай уллу, къагьрулу терактны алды неге алынмагъан, шогъар ёл неге берилген, шонча адам жыйылагъан ер неге тергевсюз къалгъан, неге полицияны къуллукъчулары болмагъан…?!»- деген ойлар яллыкъ бермей...

Ойлашмакъдан, къазапланмакъдан пайда ёкъ, болагъаны болуп битген… Ата-аналар яшларындан, яшлар ата-аналарындан, ватандашлар уьягьлюлеринден, уланкъардашларындан, къызардашларындан, ювукъларындан, досларындан айрылды…

Оланы къайтарып болмай. Озокъда, оланы рызкъысы битген болгъандыр. Бары зат Есибизни къолунда.

Болса да, теракт кёплени яшавун алып гетди. Бирдагъы бир къайгъылы агьвалат адамланы ойлашдыра…