Масъалалагъа къаралды

Чараны район администрацияны башчысыны орунбасары Жалалут­дин Жамалутдинов ачды ва юрютдю. Ол, залдагъылар булан саламлашып битген сонг, шо гюн арагъа салынып ойлашылажакъ масъалаланы малим этди.

Январ айны 23-нде болгъан район администрацияны жыйынында эки масъала бар эди.

Биринчи масъала – 2023-нчю йылда армия чагъындагъы яшёрюмлени армиягъа чакъырывну ва дыгъар къайдада къуллукъ этивню планыны толув гьасиллери.

Экинчи масъала – районда Президентни къуллугъуна кандидат сайламакъ учун март айны 15-17-нде болажакъ сайлавлагъа гьазирлик гёрюв.

Чарада биринчи масъалагъа байлавлу районну башчысыны орунбасары Элдар Давутов гьисап берди.

Докладчыны сейлевюнден ачыкъ­ болгъаны йимик, районда армия чагъындагъы 3063 яш учётда токътагъан.

2023-нчю йыл Ватанны алдындагъы борчун кютме язбашгъы чакъырыв кампанияны планы 104 процентге толду. Оратор оьзюню сейлевюнде районда армиягъа къуллукъ этме йибермек учун гюз чакъырывну планы булан толса да, шо иш къыйын шартларда оьтгенин, алда токътагъан планны яшавгъа чыгъармакъ учун кёп гьаракат этме, яшланы, оланы ата-аналарыны арасында англатыв ишлер оьтгерме, гьатта ихтияр якълав органланы къуллукъчуларын къуршап иш гёрме тюшгенин яшырмады. Натижада гюз чакъырывда армиягъа къуллукъ этме 133 адам йиберилди, шо пландан 18 адамгъа артыкъ.

Э.Давутов гюз чакъырывну гьакъында сёзюн узата туруп, ишге жаваплы ва сувукъ янашгъан юрт­ланы ВУС-ларыны атларын да малим этди. Яхшы ишлегенлени сыдралары Къарабудагъгент, Манас, Манасгент ВУС-лар макъталды. Губден, Къурбуки, Зеленоморск, Аччи поселокну ВУС-ларыны ишин танкъыт этди.

Докладчыны сейлевюнден мекелли болгъаны йимик, район уьлкени Савутлу Гючлерини сыдраларында дыгъар къайдада къуллукъ этме адамлар танглавну ва частлагъа йиберивню планын да яшавгъа чыгъаргъанын эсгерди. Демек райондан 140 адам дыгъар къайдада къуллукъ этме къол салгъан, шо районгъа гёрсетилген план.

Чарада оьзюню сёйлевюн тамамлай туруп, Элдар Давутов бу йылдан тутуп, армиягъа къуллукъ этме чакъырыв оьзюгер 30 йылгъа ерли экенин ачыкълашдырды. Бу гюнлерден тутуп 2007-нчи йылда тувгъанланы учётгъа алыв юрюлегенинин айтды, бу ишге ВУС-ну ёлбашчыларын жаваплы янашма чакъырды.

Шо гюнгю чарада экинчи масъалагъа, демек районда март айда Президентни къуллугъуна кандидат сайламакъ учун болажакъ сайлавлагъа гьазирлик гёрюв ишлени барышы гьакъда районну статистика бёлюгюню ёлбашчысы Нажмугьуда Гьасанов гьисап берди.

Ону сёйлевюнден мекенли болгъаны йимик, март айны 15-17-нде болажакъ сайлавланы оьр даражада оьтгермек учун, гьазирлик ишлер юрюлегенин, сайлавланы гюнюнде районда 33 сайлав участкалар эшиклерин ачажагъын эсгерди.

Док­ладчы оьзюню сёйлевюнде сайлав участкаларда сайлавлагъа гьазирлик гёрювде бар кемчиликлени де юзюн ачды. Демек 12 сайлав участкада тюгюл сакъатлар тавуш бермек учун пандуслар ёгъун ачыкъ этди.

9 сайлав участкада сайлавланы гюнюнде интернет байлавлукъ, къалгъанларында видеокамералар ишлежек. Ондан къайры да, Н.Гьасанов билдиреген кюйде, 137 адам сайлавлагъа байлавлу билимлерин камиллешдирген. Олар февраль айны 17-нден март айны 7-сине ерли ерлерде гьар ожакъгъа гирип сайлавчулар булан англатыв ишлер юрютежек, сайлавчуланы списокларын тизежек, савлугъуна гёре сайлав участкагъа гелип болмайгъан ёлдашлардан арзалар алажакъ, сайлавланы гюнюнде сайлав участкаланы уьюрлери шолайланы уьюне баражакъ,- деди Н.Гьасанов.

Чараны ахырында армиягъа къуллукъ этме адамлар йибермек учун, язбаш ва гюз чакъырыв кампания да намуслу ишлеген, дав учет столланы ёлбашчыларыны бир гюбюне район администрацияны «Гьюрметлев грамоталары» тапшурулду.