Аврувлагъа агьамият

20-нчы февралда район админи­страцияны жыйынлар оьтгерилеген уллу залында яшларда болагъан полиомиелит аврувну алдын алмакъ учун жыйын оьтгерилди. Шо жыйында бизин районубузну ичиндеги яшлар бавланы, школаланы жаваплы къуллукъчулары, район больницаны врачлары, Роспотребнадзорну вакиллери оьзлени ортакъчылыгъын болдурдулар.

Олай да, шо ёлугъувда Россияны полиомиелит аврувгъа къарайгъан комиссиясыны председатели Армен Макарян, Пироговну атындагъы РНИМУ-ну доценти, медицина илмуланы кандидаты Иван Коновалов ва оьзге медицина тармакъны вакиллери де ортакъчылыкъ этдилер ва оьзлени шо аврувгъа байлавлу таклифлерин бердилер.

Жыйынны ачгъан ва юрютген район администрацияны башчысыны орунбасары Жалалутдин Жамалутдинов райондагъы билим берив ва савлукъ идараланы жаваплы къуллукъчуларын шу гётерилген масъалагъа тюзевлю кюйде янашмагъа чакъыра туруп, ата-аналаны арасында англатыв ишни генг кюйде юрютмеге тапшурду.

Роспотребнадзорну Къарабудагъгент райондагъы бёлюгюню ёлбашчысы Омар Абачараев полиомиелит аврувну гьакъында баянлыкълар берди. Ону сёзлерине гёре, яшлар полиомиелит аврув булан авруса, олар оьзлени оьмюрюнде юрюмейген болмагъа бола, яда буса коляска булан айланмагъа имканлы. Демек, эсгерилген аврув савлай ­оьмюрюне яшны сакъат этмеге бола.

Шо саялы да, О.Абачараев эсгерген кюйде, врачланы ва алимлени таклифлерине къулакъ асмагъа ва тынгламагъа тарыкъ. Ата-аналар оьзлени яшларыны савлугъуну гьайын этмеге борчлулар.

Гьюрметли ата-аналар, яшларыбыз бизин гележегибиз буса, шоланы савлугъуну гьайында турмагъа тарыкълыгъыбызны унутмагъыз!