Къоркъунчсузлукъну болдурув...

Район администрацияны аппаратыны гезикли жумалыкъ жыйыныны ишинде администрацияны башчысыны орунбасарлары управлениелерини, бёлюклерини ёлбашчылары, юртланы башчылары, райцентрде иш гёреген къурумланы ёлбашчылары, чакъырылып гелген къонакълар ортакъчылыгъын болдурдулар.

Чараны районну башчысы Магьмут Амиралиев ачды ва юрютдю. Ол шо гюн къаралажакъ аслу масъалалагъа гёчгюнче, залдагъылар булан саламлашып битген сонг, районда янгы охув йылны шатлыкъны шартларында башламакъ учун районну школаларында педагогика коллективлени гючю булан кёп иш этилгенин бирдагъы керен такрарлады.

Бу йыл янгы охув йылны башында Къарабудагъгент юртда 250 яшгъа, Дёргелиде 200 яшгъа ери булангъы яшлар бавлары ачылажагъын, бираз заман гетип, Жанга юртда да янгы яшлар баву пайдаланывгъа берилежегин иштагьы булан эсгерди.

Сёзюн узата туруп, Магьмут Амиралиев Билимлени гюнюнде бары да школаларда Пачалыкъ Байрагъын гётерив, гимни согъув булан башланма тарыгъын эсге салды.

Украина себеп болуп, айлана якъда тувулунгъан гьалгъа гёре, районну халкъгъа билим берив управлениесини ёлбашчысына, школаланы директорларына, муаллимлерине яшланы патриот ругьда тарбиялавгъа тергевню гючлендирме таклиф этди. Школаларда Къоччакълыкъны дарсын оьтгерегенде, ерли дав агьвалатланы ортакъчыларын, тамазаланы къуршап иш гёрме , яшланы патриот ругьда тарбиялав гьаракатда бизин районда дав агьвалатларда ортакъчылыкъ этип уьлкебизни харлысызлыгъы, яш наслуну гележек шат яшаву саялы, Украинада миллетчиликни алдын алмакъ учун юрюлеген давда жанын къурбан этгенлени игитликлерин мисалгъа гелтирип чаралар оьтгерме таклиф этилди.

1-нчи сентябрде бизин районда Къарабудагъген, Дёргели юртларда яшлар бавларыны ачылывуна байлавлу болуп республика оьлчевде къонакълар гелме бола, шо саялы юртланы башчылары, тийишли къуллукъланы къуллукъчулары жамият низамны болдурувну къатты чараларын гёрме таклиф этди. Август айны 30-нда район администрацияны аппаратыны жыйынында эки масъалагъа къаралды:

1.Билимлени гюнюнде жамият низамны болдурув.

2.11-нчи сентябрде, бирикген сайлавланы гюнюнде, болажакъ сайлавлар.

Биринчи масъалагъа гёре районну жамият низамгъа къарайгъан полициясыны начальнигини орунбасары Насух Магьамматов гьисап берди.

Ол ерлерде 1-нчи сентябрде жамият низамны болдурмакъ учун районну полициясыны къуллукъчуларыны янындан гёрюлген чараланы малим этди. Ону сёйлевюнден ачыкъ болгъаны йимик, Билимлени гюнюнде районну юртларында школаларда ва оьзге шатлы чаралар оьтгерилежек ерлерде полицияны къуллукъчулары дежурналыкъ этежек. Шо муратгъа гёре районну полициясыны 77 къуллукъчусу, тыш яндан гелген 10 адам къуршалажакъ. Къаравулланмагъан гьал болуп къалса, резервде дагъы да адам гюч бар.

Насух Магьамматов чарада ­оьзюню сёйлевюн тамамлай туруп: бары да школаланы айлана якълары, класланы ичлери, спортзаллар кинологлар булан охув процес башлангъынча тергелип чыгъажакъ. Гьеч шекли затны гёрген адам болса, алгъасавлукъда тийишли къуллукъгъа билдиригиз,-деп битдирди оьзюню сёйлевюн районну полициясыны вакили.

Экинчи масъалагъа гёре районну территория сайлав комиссиясыны председатели Магьамматсайит Алпанаев маълумат берди. Ону сёйлевюнден ачыкъ болгъаны йимик, токъташдырылгъан сайлавланы гюнюнде районну бир юртунда «Къакъашура юрт советге» депутат сайламакъ учун сайлавлар оьтгерилежек.

Сайлавлар эки гюн – 10-11 сентябрде болажакъ.

Магьамматсайит Алпанаев береген далиллер исбатлайгъан кюйде, юртда 5222 сайлавчу бар. Олар 3 сайлав участкада тавуш бережеклер.

Юрт советге депутатлыкъгъа 5 адам оьзлени кандидатураларын салгъан эди, экиси кандидатураларын тайдыргъан, 3 адам къалгъан.

Сайлавланы къурумлу кюйде оьтгермек учун, бары да чаралар гёрюлген. Участка сайлав комиссияланы уьюрлери токъташдырылгъан, олар тарыкълы алатлар булан таъмин этилежек.

Сайлав участкалар Роспотребнадзор талап этеген къорув алатлар булан таъмин этилежек. Бюллетенлени сакъламакъ учун сейфлер бар. Полицияны къуллукъчуларына сентябр айны 9-да ахшамдан тутуп эки гюн бюллетенлени аманлыгъын, сайлавланы гюнюнде жамият низамны болдурмакъ къала.

Чараны ахырында оьзюню гьасил чыгъарып сёйлевюнде районну башчысы Магьмут Амиралиев 1-нчи сентябрде районда оьтгерилежек шатлыкъланы барышында жамият низамны болдурувда юртну башчыларын, тийишли къуллукъланы къуллукъчуларын жаваплы янашып иш гёрме чакъырды.