Пайдалы пикру алышдырыв болду

Август айны 13-нде бизин уьлкеде Физкультурникни гюню белгилене. Шо агьвалатгъа байлавлу болуп, август айны 3-нде редакцияда оьзлени заманында районда спорт ишлени жанландырывда, районну абурун гётеривде, яш наслуну спорт булан машгъул болма иштагьын артдырывда аслам къошумун этген ёлдашланы, спортну ветеранлары Абдулмуслим Шагьманаев, районда спортну самбо журасындан устасы Казбек Къурбанов, футболдан районланы арасында республиканы бир нече керен чемпиону, кубокгъа ес болгъан, армияда къуллукъ этген йылларында волейболдан савутлу гючлени арасында чемпион, республиканы жыйым командасыны уьюрю Агьматпаша Далгьатов, ДР-ни физкультурасыны ат къазангъан къуллукъчусу Имамитдин Жалилов, 70-нчы йылларда футболдан районну жыйым командасыны аслу оюнчусу, шо йылларда бизин районну командасы къолда этген оьрлюклеге оьзюню бажарывлулугъу, усталыгъы булан аслам къошумун болдургъан Сиражитдин Салаватов, оьсюп гелеген яш наслуну тарбиялавда, спортгъа иштагьлылыгъын уятывда оьз къошумун болдургъан, Уллубийавул орта школаны сынавлу абурлу физкультурадан дарсберивчюсю, спортну ветераны Гьюсейхан Мамаев, районну спорт комитетини ёлбашчысы Завур Умаракъаев, Къарабудагъгент ДЮСШ-ни директору Магьамматдагьир Исрапилов ёлдашлар ортакъчылыгъын болдурдулар ва районда оьсюп гелеген яш наслуну спортгъа къуршамакъ муратда пикру алышдырывлар болду.

Ёлугъувну юрютювчю Асадулла Гьажиев:

– Бугюн жыйылгъанлыгъыбызгъа себеп, оьрде де эсгерилип гетгени йимик, 13-нчю августда Физкультурниклени гюню. Сизин, бугюн мунда барланы, оьз­гелер булан янаша районда спорт­ну жанландырывда, оьрлюк­лени къолда этивде гьаригизни аслам къошумугъуз бар. Биз яш йылларыбызда, янгыз биз тюгюл, савлай районну халкъы, футбол, волейбол ойнайгъан кююгюзге, усталылыгъызгъа, бажарывлулугъузгъа къарап леззет ала эдик. Сиз бизин кумирлерибиз эдигиз, сизин оюнугъузгъа, спортда етишген оьрлюклеригизге къарап, районну халкъы къувана, оьсюп гелеген яш наслу уьлгю ала эди.

Буссагьатгъы вакъти районда спортгъа тергев екъ. Гьасиллер осал деп айт­ма сюймеймен, тек спортну бир-бир жураларындан макътанма болмайбыз, сиз ойлашагъан кюйде, районда спортну дагъыдан-дагъы гётермек, оьсюп гелеген яш наслуну орамны терс таъсиринден айырмакъ учун, сизин къаравларыгъызны билме сюе­биз, деп районда спортну биринчи пропагандисти Абдулмуслим Жалалович Шагь­манаевге сёз берди.

Ол булай деди:

– Мен яш чагъымда билимге, оьр билим алма гьасирет эдим. Бары затны къоюп, спорт булан машгъул болмадым. Амма спортгъа иштагьым бар эди. Шо саялы да болма ярай, школаны битдирген сонг, Орджоникидзе шагьарда физкультурниклер гьазирлейген оьр охув ожакъгъа охума тюшдюм. Оьр охув ожакъны битген сонг, ата юртума школагъа физкультураны муаллими болуп иш башладым. Мен оьр охув ожакъны охуп битдирип, къайтгъанда къурдашларым Агьматпаша, Казбек ва оьз­гелери армияда эди. Башлап юртда спортну жанландырмакъ учун волейбол, футбол командалар къурма спортчулар тапма болмай эдик. Мен бирдагъы керен такрарлайман, мени Казбек йимик, спортда къолда этген уьстюнлюклерим ёкъ, тек спорт ишлеге жаным авруй эди. Мен оьр охув ожакъда охуйгъан йылларымда, каникулланы вакътисинде, уьйге къайтагъанда, столну уьстюнде ойнайгъан теннис шариклер, эки ракетка, сетка алып геле эдим. Школаны фойесини бир мюю­шюнде бузукъ парталардан стол къурашдырып, яшланы теннис ойнама уьйретме башладым…

Къурдашларым Агьматпаша, Казбек ва оьзгелери армиядан къайтдылар. Районда волейбол, футбол оюнланы гётеривде, бизин районну жыйым командасы етишген оьрлюклерде шо заманларда Агьматпаша Далгьатовну айрыча къошуму болгъанны эсгерме сюемен. Ол армияда къуллукъ этеген йылларында волейболдан яхшы натижалагъа етишип къайтды. Макътанып айтагъаным тюгюл, гетген асруну 70-нчи йылларында районда спортну жанланывуна биз, Казбек Къурбанов, Агьматпаша Далгьатов, М-сайит Гьабитов, мисгин Вагьит Вагьитов, бугюн мунда бизин булан бар Имамутдин, Сиражутдин, къурдашыбыз Гьюсейхан Мамаев ва оьзгелер, лайыкълы къошум болдурдукъ. Бизин вакътибизде, гьали йимик, спорт булан машгъул болма шартлар, имканлыкълар, тарыкълы алатлар къайдагъы зат эди. Амма гьаракат, спортгъа сююв бар эди. А.Ж.Шагьманаевге: “Районда спортну, авур ва енгил атлетиканы ва башгъаларын гётермек, гьасиллер болсун учун, не этме тарыкъ?”- деген соравгъа ол бир сёз булан булай деди:

– Къазанчы къайнамаса, къазан къайнамас. Мен мунда айтма сюегеним, районну школаларында, ДЮСШ-де физкультурадан дарс береген муаллимлер, тренерлер оьз ишин сюеген, багьана буса да, спортгъа иштагьы бар, спорт ишлеге жаны авруйгъан адам болма тарыкъ. Гьали бизин школаларыбызда физкультурадан дарс береген муаллимлер турникде нече керен тартылып бола экен? Физкультура дарсда яшлагъа топ да берип, оьзлер ягъада эретуруп, семичка черте буса, олай нечик бола? Районда спорт ишлени гётермек, гьасиллени яхшылашдырмакъ учун школаланы директорлары, районну билим берив управлениеси, районну спорт комитети физкультурадан дарс береген муаллимлени ишине тергевню, талапны гючлендирме тарыкъ.

Магъа белгили болгъаны йимик, бизин школаларда башлапгъы класларда физкультура дарсланы оьзлер предметниклер юрюте. Шо тюз тюгюл деп эсиме геле. Яшны башлапгъы класлардан тутуп къаркъарасын чыныкъдырмакъны гьайын этме, спортну къайсы журасына гьаваслыгъы, иштагьы барны токъташдырма, шолайлар бар буса, олар булан айрыча иш юрютме тюше. Шо саялы башлапгъы класларда яшлагъа физкультура дарсны хас физкультура билими булангъы ёлдашлар юрютме тарыкъ деп гьисап этемен, — деди А.Шагьманаев.

Чарада ортакъчылыкъ этген Казбек Къурбанов оьзю­ню ёравларында спортну гётермек учун оьзю белгили спортчу болмаса да, спортну сюеген, огъар жаны авруйгъан адам болма тюшегенин айтды.

– Биз ишлейген йылларда гьалиги йимик онгайлыкълар тюшюбюзде де гёрюнмеген. Мен яшланы бир гиччи уьйде бир имканлыкълар да ёкъ, тахта-тухтадан къурашдырылгъан, уьстюне гьар-тюрлю зат яйылгъан халча деп айтма ярамайгъан шартларда уьйрете эдим. Бир мююшде ток печде сувдан толгъан педиредеги сув булан чайынып гете эдик. Спортгъа берилип ишледик, шолай шарт­ларда да мен тарбиялагъан эки яшым спортну самбо журасындан спортну устасы деген атгъа ес болду. Мен ёлдашларымны пикирлерин якълайман. Районда спортну масъаласын гётермекни, школаларда физкультурадан дарс береген муаллимлени, ДСШ-ни тренерлерини жавапчылыгъын гётермекни гьайын этме тарыкъ. Газетлерде бу юртда футбол майданча ачылды деп языла. Шо нечакъы да яхшы. Оьсюп гелеген яш наслуну орамны терс таъсиринден къорумакъ учун этилеген ишлер къайсыбызны да къувандыра, тек шолай имканлыкълар да бар туруп, спортну оюн жураларындан натижалар ёкълугъу ойлашдыра,- деди К.Къурбанов.

Дёгерек столну айланасында болгъан пикру алышдырывда ортакъчылыкъ этген оьзге ёлдашлар да районда школаларда спортну дагъыдан-дагъы жанландырмакъ учун оьзлени ойларын-пикруларын айтдылар, районну спорт комитетини ёлбашчысы З.Умаракъаевге таклифлерин бердилер.

Чарада ортакъчылыкъ этген районну спорт комитетини ёлбашчысы Завур Умаракъаев оьзюню сёйлевюнде булай деди:

– Пайдалы ёлугъув болду. Сиз чола табып бу ёлугъувгъа гелип, берген таклифлеригизни, ёравларыгъызны гьисапгъа алып, ишлеме къаст этежекбиз. Районда спортну салынгъан кюю, бар имканлыкълар, районну башчысыны янында этилеген якълав яман тюгюл. Тек негер буса да, артдагъы вакътилерде спортну оюн жураларындан натижалар къувандырмай. Амма ерлерде футбол жанлана гелегени гьис этиле. Бизин спорт школаларыбызда спортну ябушув жураларындан ушу-саньда, бокс, тутушуп ябушув, артдагъы йылларда авур атлетикадан гьасиллер къувандыра. О гьакъда район газетни бетлеринде язылып чыкъгъан, янгыдан такрарламакъны маънасы ёкъ. Сизин булангъы ёлугъув бек маъналы, сиз берген таклифлеригиз пайдалы болду, деп гьисап этемен. Районда спортну дагъыдан-дагъы гётермек, сиз берген таклифлени яшавгъа чыгъармакъ учун менден болагъан гьаракатны этежекмен.

Спортну ветеранлары булангъы ёлугъув бек маъналы ва пайдалы оьтдю ва гележекде районда спортну дагъыдан-дагъы гётериливюне болушлукъ этер, школаларда физкультурадан дарс береген муаллимлени спортгъа жавапчылыгъын уятар деп умут этебиз.