«Тюрлю ренкли байрам»

«Гьар кимни юрегинде гюнню бир гиччирек ярыгъы ва исивю бар. Шо да – рагьмулулукъ. Рагьмулу адам гьар заман яшлагъа ва уллулагъа языкъсынагъаны белгили. Рагьмулулукъ адамланы дос ва ювукъ эте. Рагьмулу ва йымышакъ хасиятлары булангъы адам булан ким де къатнамагъа ва ювукъ болмагъа гьасирет. Рагьмулулукъ адамны юрегинден гелегени ачыкъ. Рагьмулулукъ бар ерде янгызлыкъ, ачув ва оьчлюк бир де болмай», — деп эсгерди оьзюню сёйлевюнде маданият ва туризм бёлюгюню ёлбашчысы Н.Мурзаева.

«Шулай рагьмулу чаралар жамиятны арасында кёп болмагъа тар­ы­­къ­ деп ойлайман. Айрокъда шулай байрам чараланы сакъат яшлагъа ва оланы агьлюлерине багъышлап этилмеге тарыкъ. Савсуз яшланы оьз­терече къылыгъы ва хасияты булан оьтесиз ачыкъ ва рагьмулу ойлары ва сёзлери бола», — деп айтды яшёрюмлени ва социал сиясат масъалалагъа къарайгъан бёлюкню ёлбашчысы Г.Темирова.

Къарабудагъгент Баш китапхананы къуллукъчулары чараны барышында китап выставка къургъан эди. Шо выставкада сакъат ва савсуз адамланы масъалалары итти токътагъаны гьакъда язылгъан китаплар, журналлар ва газетлер тизилген эди. Олай да, шо выставкада савлугъу осал язывчуланы оьзлени чебер асарлары да охувчулар учун берилген эди.

Оьтгерилген чараны барышында жамиятны ичинде къайсы девюрде де ва не ерде де лап да тарыкълы болагъан рагьмулулукъну гьакъында лакъыр юрюлдю. Демек, чараны ортакъчылары ёммакъланы яхшы ва яман игитлерини хасиятлары булан ювукъдан таныш болдулар, олай да, чечеген ёмакъланы гьакъында ай­т­дылар. Яшлагъа гьар тюрлю гьалны вакътисинде не йимик сёзлер ва жумлалар айтмагъа гереклиги гьакъда баянлыкълар берилди.

Яшланы янына къонакълай баргъан районну администрациясыны ва китапхананы жаваплы къуллукъчулары гьар тюрлю оюнланы ойнады. Шо оюнлар яшланы гёнгюн хошлу этди деп айтмагъа ярай.

Олай да, китапхананы къуллукъчулары А.Пашаева, Д.Ильясова ва С.Гьажиева яшлар булан викториналар оьтгердилер. Айтагъаным, яшлар олар айтгъан чебер асарланы игитлерин дестине айтып бере эди.

Оьтгерилген чараны вакътисинде яшлагъа «рагьмулулукъ» («добро») ва «оьчлюк» («зло») деген сёзлени маънасы гьакъда айтылды. Гертилей де, шо сёзлер адамны яшавунда гьар гюн дегенлей ёлугъа. Сонг да, шо сёзлер булан байлавлу дюньяны уьстюндеги бары да тиллерде айтывлар бар. Яшлар шо ерде шолай айтывланы маъналары булан ювукъдан таныш болдулар.

Оьтгерилген чараны ахырында ону ортакъчылары рагьмулулукъну этмеге ва гьар заман ону якъламагъа тарыкълыгъын ташдырдылар. Олай да, шогъар байлавлу кюйде олар айлана якъдагъы адамлар булан рагьмулу ишлер этмеге ва йылы сёзлер айтмагъа чакъырдылар.

Оьтгерилген чараны ортакъчыларына РЦТК-ни къулулкъчуларыны гючю булан концерт гёрсетилди. Демек, Аскендер Исрапилов, Абдулазим Найипханов, Ирбин Шагьбанов, Нурияханум Магьамматова ва оьзгелери яшлагъа ва уллулагъа оьзлени чыгъышларын савгъат этдилер.