Социал биналар къурула ва тергеле
Белгили кюйде, август айны 14-нде Россияда Къурувчуну гюню белгилене. Демек, къурулуш тармакъда загьмат тёгегенлени атына лайыкълы ва макътавлу сёзлер айтыла. Олай да, шо байрамны алдында къурулуш тармакъда юрюлеген ишлени гьакъында маълуматлар бериле. Шоллукъда, «Районну яшаву» газетни хас мухбири Багьавутдин Самадов алдагъы гюнлерде Къарабудагъгент юрт администрацияны баш архитектору Абдулла Гьажиев ва «Архитектура-къурулуш ва сатыв-алыв тергев болдурагъан къуллугъу» деген муниципал къурумну ёлбашчысы Имангьюсен Шихаев булан шо гьакъда лакъыр этген. Шо лакъырны охувчуланы тергевюне беребиз.
МАЪЛУМАТ:
Гьажиев Абдулла Магьамматсаламович 1986-нчы йылда Къарабудагъгент юртда тувгъан. Ата юртундагъы орта школаны битдирген сонг, ол 2003-2008-нчи йылларда Дагъыстан пачалыкъ технический университетде инженер-къурувчу деген квалификациягъа ес болгъан. 2008-2011-нчи йылларда А.Гьажиев ДГТУ-ну аспирантурасында оьр билимин камиллешдирген.
2019-нчу йылны май айындан берли район администрацияны къурулуш ва архитектура бёлюгюню ёлбашчысы болуп ишлей. Олай да, ол ДГТУ-да кафедраны дас беривчюсю болуп оьзюню илму ёлун да узата. Ол уьягьлюсю булан 3 яшны тарбиялай ва оьсдюре.
МАЪЛУМАТ:
Шихаев Имангьюсен Шихаевич 1965-нчи йылда Таргъу юртда тувгъан. Ол Дагъыстан пачалыкъ университетни экономика факультетин битдирген. И.Шихаев ДР-ни юрт хозяйство министерлигинде гёчювюллю топуракълагъа къарайгъан алдынлы касбучу болуп ишлеген.
2008-нчи йылда И.Шихаев районда «Архитектура-къурулуш ва сатыв-алыв тергев болдурагъан къуллугъу» деген муниципал къурумну ёлбашчысы болуп белгиленген. Ол уьягьлюсю булан 4 яшны тарбиялай ва оьсдюре.
– Абдулла Магьамматсаламович, бугюн-буссагьат районну администрациясыны архитектура бёлюгю не йимик проектлени уьстюнде ишлей?
– 2021-нчи йылда этилген ишлени гьакъында алъякъда айтылгъан. Шо саялы 2022-нчи йылда районну администрациясыны архитектура бёлюгю нечик проектлени уьстюнде иш юрютегени гьакъда баянлыкълар берейим.
Шо гьакъда ачыкълашдырып айтсакъ, 2022-нчи йылны ичинде Къарабудагъгент, Губден ва Уллубийавул юртларда гьарисинде 604 охувчу билим алмагъа болагъан школалар учун хас документлер онгарылып тура. Шо школалар билим беривню оьсдюрмек учун къабул этилген хас программалагъа гёре къурулмагъа гёз алгъа тутула.
Олай да, гиччипавланы тарбияламакъ муратда яшлар бавлары къурулмагъа тарыкълыгъы ачыкъ. Шо гьакъда пачалыкъны къабул этилген программасы да бар.
Шоллукъда, районну ичинде 8 юртда яшлар бавларыны биналарын къурмакъ учун проектлер гьазирленген ва ювукъ гюнлени ичинде тарыкълы идаралагъа йиберилежек.
Ачыкълашдырып айтсакъ, Къарабудагъгент юртда 250 яш учун янгы яшлар баву къурулмагъа герек. Олай да, Паравул, Къакъашура, Аданакъ, Зеленоморск, Губден ва Къурбуки юртларда да гьарисинде 200 гиччипав учун яшлар баву къурулажакъ. Къакъамахи юртда буса 75 гиччипавгъа тарбия ва билим бермеге болагъан яшлар бавун къурмагъа гёз алгъа тутулгъан.
– Абдулла Магьамматсаламович, районну топуракъларында къурулагъан оьзге тюрлю биналагъа ва объектлеге сизин къошумугъуз бармы?
– Артдагъы йылланы ичинде районубузну топуракъларыны уьстюнде кёп тюрлю санавда инвестиция проектлер ва майданчалар къурулуп тура. Шоларда промышленност, логистика тармакъланы, сонг да, гьар тюрлю къурулуш ишлер юрютеген бирлешивлени проектлери яшавгъа чыгъарыла.
Туризм тармакъгъа байлавлу айтсакъ, гёзел Каспий денгизни боюнда къурулагъан ял алагъан биналаны проектлерин къурмагъа ва тизмеге бизден болагъан кёмегибизни этебиз. Шо ишлер тувра бизин борчубуз тюгюл буса да, районубузну экономикасыны оьсювюне болушлукъ этеген проектлени ва программаланы яшавгъа чыгъырылывуна къошумубузну болдурабыз.
– Имангьюсен Шихаевич, сиз ёлбашчылыкъ этеген къуллукъну аслу борчлары гьакъда баянлыкълар бермекни арив гёребиз.
– Шо борчларыбызны гьакъында ачыкълашдырып эсгерейим. Масала, къурулуш тармакъда оьтгерилеген тергевлени биз юрютебиз. Шону булан янаша сатыв-алыв ва къурулуш ишлени юрютювде законланы бузагъанланы жавапгъа тартабыз, шолай адамлар булан англатыв иш юрютебиз.
Олай да, бизин къурумубуз район администрацияны тапшуруву ва буйругъу булан сатыв-алыв юрютювде, ашамлыкъ ва юрт хозяйство продукцияны болдурувда сатывчуланы ва алывчуланы талапларын яшавгъа чыгъармакъ учун тийишли шартлар болдурмагъа чалышабыз. Шолар булан бирче шу биз оьрде эсгерген тармакълагъа къыйышывлу башгъа къуллукъланы да кютебиз.
– Сиз оьрде эсгерген тармакъларда законну бузагъанлагъа не йимик чаралар гёрюле? Оланы нечик жавапгъа тартасыз?
- Законгъа къыйышмайлы къурулуш яда сатыв-алыв юрютеген далапчыланы бизин къурумубуз жавапгъа тарта. Ачыкълашдырып айтсакъ, биринчилей, биз шо адамлар булан лакъыр этебиз, олагъа оьзлени кемчиликлерин тайдырмакъны авуздан таклиф этебиз.
Гьалиги заман адамлар къурулуш булан кёп машгъул. Биревлер уьйлерин янгырта, бирлери – тюкенлер къура, башгъалары башгъа тюрлю ишлер эте. Шо заман олар къурулуш алатланы (стройматериал) ёлда орамны уьстюнде къоя. Шо буса адамлагъа ва машинлеге пуршавлукъ эте ва юртну гёзеллигин буза. Биз шолай адамланы да жавапгъа тартабыз.
– Лакъырлашыв этгенигиз саялы баракалла.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
