Гьазирлик юрюле
Къарабудагъгент районну башчысы Магьмут Амиралиевни хас буйругъуна гёре, алдагъы гюнлерде «Къарабудагъгент район» муниципал районну Жыйыныны ёлбашчысы Адил Салаватов, районну жамият палатасыны ёлбашчысы Абдулгьамит Мамагишиев ва район Жыйынны аппаратыны ёлбашчысы Бекболат Сахаватов районну ичиндеги бир-нече школагъа тергевюн болдурмакъ муратда сапаргъа чыкъдылар.
Айтагъаным, олар Паравул 2 номерли, Гьели, Къурбуки 1 ва 2 номерли орта школаларда болдулар ва шоларда юрюлеген капитал ва оьзге ремонт ишлени барышына тергев этдилер.
Яйлыкъ каникулланы вакътисинде Паравул 2 номерли, Уллубийавул ва Къурбуки 1 номерли орта школаларда капитал ремонт ишлер юрюлюп тура. Шо ишлер РФ-ни Президенти Владимир Путинни ва «Бирикген Россия» деген партияны тувра буйрукъларына гёре оьтгериле. Демек, шо эсгерилген школаларда пачалыкъны янындан кёп миллион манатлар харж гёрсетилген ва мукъаятлы кюйде капитал ремонт этилежек.
Оьзлени тергев болдурагъан сапарында районну гьакимлери ва ёлбашчылары капитал ремонт булан янаша юрюлеген оьзге ремонтланы да барышына тергевюн болдургъанлар. Демек, Гьели ва Къурбуки 2 номерли орта школаларда увакъ-тюек ремонт ишлер булан бирче янгы охув йылгъа да онгарылывлар юрюлюп тура.
«Бизин районубуздагъы школаларда артдагъы йылланы узагъында кёп уллу ремонт ишлер юрюле. Шону булан бирче школаланы материал-техника базасы ва охув методика ясандырыву яхшылаша ва беклеше. Муна бу йыл районубуздагъы 3 уллу школада капитал ремонт оьтгерилип тура. Шо ишлер август айны 15-нде тамамланмагъа тарыкъ. Гелеген йыл дагъы да шолай 3 школада капитал ремонт этилмеге гёз алгъа тутула.
Бугюн-буссагьат юрюлюп турагъан ремонт ишлер ва янгы охув йылгъа онгарылывлар яхшы деп айтмагъа ярай буса да, арадан йиберилеген кемчиликлени алдын алмагъа тарыкъ болажакъ»,- деди район Жыйыныны ёлбашчысы, Къарабудагъгент гимназияны директору Адил Салаватов.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
