Бар имканлыкълардан толу кюйде пайдаланма тарыкъ

Чараны гиришив сёз булан районну башчысы Магьмут Амиралиев ачды ва юрютдю. Ол залдагъылар булан саламлашып битген сонг, гетген хамисгюн ДР-ни Башчысы Сергей Меликов ва ону узатагъан республиканы жаваплы къуллукъчулары бизин районда ишчи сапары булан болгъанын, республиканы ёлбашчылары бизин районну социал-экономика оьсювюне айрыча тергев берегенин, бизин район республиканы районларыны арасында ал сыдраларда юрюйгенин де яшырмады.

Республиканы башчысы С.Меликов ва оьзге жаваплы къуллукъчулар районну 15 де къолай точкаларында, объектлеринде болгъанын, ишлени барышына яхшы багьа бергенин, районну дагъыдан-дагъы социал-экономикасын гётерме, ватандашланы яшав даражасын, кютюлеген къуллукъларын яхшылашдырывда бар имканлыкъланы къоллап, иш гёрме чакъыргъанын ва ­оьзге тапшурувлар бергенин аянлашдырды.

Гетген жума район администрацияны гезикли жыйынында районда туризмни оьсдюрюв масъала арагъа салынып ойлашылды. Шо ва бизин районгъа гелеген сапарчыланы лайыкълы къаршыламакъ учун этилген ишлени, туризмни оьсдю­рювде районда бар имканлыкъ­ланы гьакъында баянлыкъ берме трибунагъа районну башчысыны орунбасары Жалалутдин Жамалут­диновну чакъырды.

Ол оьзюню сёйлевюн булай башлады:

- Бизин районну сапарчыланы макънатисдей (магнит) оьзюне тартагъан ёллары кёп. Чинкдеси, тарихи-маданият наслусу, районубузну ерлешген кюю, транспорт булан барма-гелме онгайлыгъы, мунда яшайгъанланы оьзтеречилиги ва мердешлери.

Сапарчы гьаракат янгыз­ районну бай маданият, тарихи имканлыкъларын сакъ­лавгъа болушлукъ этип къоймажакъ, сапарчылыкъ ерли бюджетни толумлашдырывгъа да аслам къошумун болдуражакъ.

Бизин район туризм зона гьисаплана. Каспий денгизни бою булан 46 километр чакъырымгъа узатылгъан. Бай, эмли сувлары ва оьзге табии онгайлыкълар республикада гележеги бар районланы сыдраларына гире.

Районубузну топуракъларында «Кавказ» федерал сылама ёл, Темиркъазыкъ Кавказ темир ёл, халкъара «Магьачкъала» аэропорт ва оьзге онгайлыкълар сапарчыланы бизин якълагъа ял алма, табии аламатлар булан таныш болма, савлугъун беклешдирме имканлыкълар ярата.

Бизин район сапарчыланы оьзюне янгыз денгиз бою булан тартып къоймай, районну топуракъларында тарихи ва маданият эсделиклер кёп. Оланы бирлерини федерал, республика агьамияты бар.

Докладчыны сёйлевюнден ачыкъ болгъаны йимик, Каспий денгизни боюнда, арив къайыр пляжлары булан савлай агьлюню уьюрлери ял алма болагъан 3 уллу санаторий ерлешген. Оларда 1470 адамгъа ер бар. Ондан къайры да, 4 савлугъун камиллешдиреген лагер иш гёре, 1050 ери бар.

Докладчы оьзюню сёйлевюнде Темиркъазыкъ­ Кавказ федерал округда биргине-бир аякълардан, къоллардан сакъат адамлар коляскалары булан денгизге гирип киринме болагъан «Язбаш» деген база барны уллу гьюрмет булан эсгерди. Мунда 60 адамгъа ер бар.

Оратор оьзюню сёйлевюнде сапарчыланы оьзюне тартагъан, районну халкъы оьктем болагъан ерлени эсгерди. Оланы арасында уллу, Каспий денгизни лап гёзел еринде, республикабызны тахшагьарындан 45 чакъырым къыблада ерлешген «Каспий» санаторий. Озокъда, Европада лап уллуларындан гьисапланагъан, бир ерден чыгъагъан таза ичеген суву булангъы «Бекенез».

Районда сапарчыланы интереслерин ­оьзюне тартагъан табии объектлер ва оьзгелери аз тюгюл. Шолайлардан районда бар анакълар, археология эсделиклер ва башгъалары.

Сапарчыланы тергевюн оьз еслигинде иш гёреген музейлер де тартма бола. Масала, къарабудагъгентли Агьматпаша Алиболатов «Старинный двор» деген тарих музей ачгъан. Музей кёп къадарда СССР-ни девюрюнде, Россияда инкъылапдан алда чыкъгъан эсги алатлар, антиквариат булан толумлашгъан. Сапарчыгъа музейде оьзюню интересине гёре къарама, таныш болма кёп зат бар. Сюйген адам ошатгъан затын сатып алма да бола.

Музейге гирегенде гьакъ алынмай.

Сапарчыланы арасында гьар тюрлю къайдада ял алмагъа сюегенлер бола. Масала, биревлер парахат, алгъасавсуз ял алывну танглай, оьзгелер тавларда ва оьзге экстремал ял алывну сюе. Бизин районну майданларында ял алывну къайсы къайдасы булан машгъул болма сюеген ёлдашгъа да имканлыкълар яратылгъан.

Ж.Жамалутдиновну сёйлевюнден ачыкъ болгъаны йимик, районну сапарчыларыны маршрутуна ООО агрофирма «Герей-тюз» де гирген. Бу предприятие районда лап уллу юрт хозяйство предприятие гьисаплана. Мунда юзюмню столовой ва техника журалары оьсдюрюле, 2019-нчу йылда предприятиеде чагъыр этеген завод ишге берилген. Ону сапарчыланы оьзюне тартагъан имканлыкълары, онгайлыкълары уллу. Докладчы жыйында оьзюню сёйлевюн тамамлай туруп, сапарчыланы, гелген къонакъланы тергевюн тартма болагъан кёп тюрлю маршрутланы аян этди.

Чарада районну башчысы Магьмут Амиралиев районну актив волонтёрларыны бир группасына шагьатнама книжкалар тапшурду. Оьзюню гьасил чыгъарып сёйлевюнде юртланы башчыларын гьар тюрлю программаларда актив кюйде ортакъчылыкъ этме тапшурду.

Бу йыл районда къурулма башланажакъ ­оьбъектлени малим этди.