Далапчылагъа абур этилди
Белгили кюйде, 26-нчы майда бизин уьлкебизде Россияны далапчыланы гюню белгилене. Демек, гьар тюрлю тармакъда далапчылыкъ юрютегенлеге абур ва гьюрмет этиле, оланы атына лайыкълы сёзлер айтыла. Шоллукъда, тюнегюн, 26-нчы майда, район администрацияны жыйынлар оьтгерилеген уллу залында районну ичинде далапчылыкъ булан машгъул болагъанлар булан районну башчысы Магьмут Амиралиевни ёлугъуву оьтгерилди.
Шо ёлугъувда район администрацияны бёлюклерини ёлбашчылары, районну ичиндеги юртланы башчылары булан бирче «Махачкала» деген халкъара аэропортну ёлбашчысы Сайит Рамазанов ва районну ичинде иш гёреген дагъы да предприятиелени ёлбашчылары оьзлени ортакъчылыгъын болдурдулар.
Оьтгерилген ёлугъувну башында районну гьакимбашы Магьмут Амиралиев далапчыланы оьзлени касбу байрамы булан къутлагъан сонг, оланы къолундан гелген тюшюмню ва гелимни гьакъында баянлыкълар берди.
- Ачыкълашдырып айтсакъ, районубузну бюджетине тюшеген гелимибизни оьлчевю 321 миллион манатгъа етишген. Олай да, 2021-нчи йылда бизин юзюмчюлерибиз 19 минг тондан артыкъ тюшюм алгъан. Ашлыкъны буса 2 миллиард манатны къадарында сатгъан.
Районубузну ичиндеги юрт хозяйство мал болдурувчулар умуми алгъанда оьтген йылны ичинде 6 миллиард манатны къадарында тюшюм алгъан ва продукция болдургъан. Шо буса, бизин районубузну ва республикабызны социал-экономика оьсювюне кёп уллу къошум ва ашамлыкъ продукталаны болдурувда аманлыкъ деп айтмагъа болабыз, — деди М.Амиралиев.
Оьтгерилген ёлугъувну барышында район администрацияны экономика ва территориал оьсюв бёлюгюню ёлбашчысы Фархат Магьмутов, районну юрт хозяйство управлениесини ёлбашчысы Шагьабутдин Мустапаев далапчылагъа ва юрт хозяйство мал болдурувчулагъа пачалыкъны янындан гёрсетилеген акъча маяланы гьакъында мекенли кюйде маълуматлар бердилер.
Ф.Магьмутова ва Ш.Мустапаев оьзлени сёйлевлеринде эсгерген йимик, артдагъы йылланы боюнда далапчылагъа пачалыкъны янындан кёп къадарда кёмек болдурула. Шо кёмек аслу гьалда промышленность ва юрт хозяство тармакъларда ишлейгенлеге этиле. Шоланы мекенли билмек учун район администрацияны шо бёлюклерине ёлукъмагъа бола.
Олай да, ёлугъувда адамланы иш булан таъмин этеген центрны (ЦЗН) ёлбашчысы Шихай Биярсланов ва «Махачкала» деген халкъара аэропортну ёлбашчысы Сайит Рамазанов сёйледилер ва оьзлер ёлбашчылыкъ этеген идараланы бугюнгю чалышыву гьакъда айтдылар.
Ёлугъувну барышында районну гьакимбашы Магьмут Амиралиев юрт хозяйство тармакъда чалышагъан далапчылагъа, сабанчы-фермер хозяйстволаны ёлбашчыларына, юрютеген агьамиятлы иши саялы баракалласын билдирген сонг, олагъа дагъы да гелим ва оьрлюклер ёрады.
Ёлугъувну ахырында далапчылыкъда къайратлы загьмат тёкген ва оьрлюклеге етишген ёлдашлагъа районну администрациясыны атындан гьюрметлев грамоталар тапшурулду.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
