Агьамиятлы масъалалагъа къаралды

Чараны гиришив сёз булан районну башчысы М.Амиралиев ачды ва юрютдю.

Шо гюнгю чарада лап агьамиятлы масъала арагъа салынып ойлашылды.

Биринчи масъала «Къарабу­дагъгент район» муниципал районда ата-анасыз къалгъан етим яшланы яшавлукъ уьйлер булан таъмин этивге ва оьзге масъалаларына къарайгъан къайюмлукъ (опекунство) этеген бёлюкню иши гьакъда маълумат берме, бёлюкню ёлбашчысы Индира Гьажиеваны сагьнагъа чакъырды.

Ол оьзюню сёйлевюн булай башлады:

- Ата-анасыз етим, къайюмлукъ этеген яшлар оьзлеге бегитилген яшавлукъ ери ёкъ буса, билим берив идаралардан чыкъгъан сонг ДР-ни муниципал районлары, шагьар округлар токъташдырылгъан социал нормадан кем болмагъан кюйде яшавлукъ майдан булан таъмин этме герек.

Тарихге гетген 2021-нчи йылда «Къарабудагъгент район» муниципал районну администрациясы етим къалгъан, оьзлени оьз еслигинде яшавлукъ майданы ёкъ 10 яшны талаплары яшавгъа чыгъарылгъан. Демек, етим яшланы яшавлукъ майдан булан таъмин этмек учун федерал ва республика бюджетден гёрсетилген акъча маялар толу кюйде муратгъа харжлангъан. 10 етим яш яшавлукъ майдан булан таъмин этилген.

Докладчыны сёйлевюнден ачыкъ болгъаны йимик, 2022-нчи йылны январ айыны 1-не районда ата-анасыз къалгъан, яшавлукъ майдангъа чарасыз, районну къайюмлукъ (опекун-попечительство) этеген бёлюгюнде 18 йылдан 23 йылгъа, дагъы да оьрде гьисапда 63 адам токътагъан.

2022-нчи йылда районгъа ата-анасыз къалгъан етим яшланы яшавлукъ майдан булан таъмин этмек учун республика бюджетден 12 миллион 288 минг манат гёрсетилген. Умуми алгъанда шо 8 етим яшны яшавлукъ майдан булан таъмин этме имканлыкъ бере. Демек, гьар претендентге 1536000 манат бола. Бир адамгъа юрт ерлерде норма булан 60 квадрат метр яшавлукъ бина тарыкъ. Шону багьасы – 1536000 манат.

Дагъыстан республиканы гьукуматыны къарары булан бизин районда бир квадрат яшавлукъ майданны багьасы – 25600 манат деп токъташдырылгъан.

И.Гьажиеваны сёйлевлеринден ачыкъ болгъаны йимик, артдагъы йылларда бир квадрат яшавлукъ майданны базар багьасы гётерилген. Шо муратлагъа федерал, республика бюджетлерден гёрсетилген акъча маялагъа яшавлукъ бина тапма къыйын бола барагъанын аянлашдырды. Биз мунда ерлерде сатылагъан яшавлукъ биналар ёкъ деп айтмайбыз, сатылагъан уьйлер бар, тек гьукумат гёрсетеген харжлагъа гелмей. Яда бузула, авма турагъан биналар, талаплагъа жавап бермей.

Бугюнге бек гьаракат этип 2022-нчи йылгъа гёрсетилген 8 яшавлукъ бинаны ерине 5-ны тапгъанбыз. Шоланы 3-ню тарыкълы документлери онгарылгъан, экисини кагъызлары МФЦ-де. Дагъы да 3 яшавлукъ бина тапма герекбиз.

Индира Гьажиева чарада сёзюн узата туруп, районну къайюмлукъ этеген бёлюгю ата-анасыз къалгъан яшлагъа алынагъан яшавлукъ биналар ихтияр якълав къурумланы янындан ерине барып тергеле. Шо саялы мени юртланы башчыларына тилевюм: юртларда сатылагъан биналаны билдиргенигизни сюер эдик.

Юртланы башчыларына мени бирдагъы бир тилевюм: ата-анасыз къалгъан етим яшлагъа оьз еслигинде яшавлукъ бинасы ёкъ деп справка берегенде, жаваплы янашыгъыз. Районну къайюмлукъ этеген бёлюгю сиз берген справкагъа гёре оланы гьисап­гъа ала, — деди И.Гьажиева.

Шо гюнгю чарада экинчи масъала гьисапда юртланы толу кюйде газлаш­дырыв масъала арагъа салынып ойлашылды. Бу якъдан алгъанда районда газны масъаласын чечивде кёп иш этилген буса да, бу тармакъда хыйлы этме герекли ишлер бар. Гележекде районда газны масъаласын толу кюйде чечмек учун юртланы башчыларына догазификацияны имканлыкъларындан генг кюйде пайдаланмакъны гьайын этме тюше. Бу масъалагъа байлавлу чыгъып сёйлеген район башчысыны биринчи орунбасары Ибрагьим Абдулмажитов догазификациягъа заявкалар беривге аслу тогъас уьйлени, топуракъ гесеклени тийишли, тарыкълы кагъызлары ёкълукъ.

Чарада районну башчысы М.Ами­ралиев гьасил чыгъарып сёйлевюнде арагъа салынып ойлашылгъан масъалаланы заманында яшавгъа чыгъармакъ учун, юртланы башчыларына, тийишли къуллукъланы ёлбашчыларына тапшурувлар берди.