«Оьлмейген полк»
Белгили кюйде, бу йыл Уллу Ватан давда совет асгерлерибиз уьст болгъанлы 77 йыл тамамланды. Уллу Уьстюнлюкню гюнюне багъышлангъан шатлыкълар уьлкебизни бары да ерлеринде алдагъы гюнлерден башлап оьтгерилип турду.
Адатлангъан кюйде, гьар йыл Уллу Уьстюнлюкню гюнюне элибизни шагьарларында ва юртларында «Оьлмейген полк» деген чара да оьтгериле.
Шо чара Бютюнроссия даражада 2015-нчи йылдан берли гьар йыл оьтгериле. 2020-2021-нчи йылларда, коронавирус аврув себепли болуп, шо чара онлайн къайдада оьтгерилген эди.
2022-нчи йылда «Оьлмейген полк» гьаракатда савлай элибизде 12 миллион адам ортакъчылыкъ этди. Дагъыстанны тахшагьары Магьачкъалада шо гюн, май айны 9-нда, оьтгерилген «Оьлмейген полк» деген гьаракатда 30 минг адам ортакъчылыгъын болдурду.
Шо чарада бизин районубузну вакиллери де актив кюйде ортакъчылыкъ этди. Шолай, 9-нчу майда 15 сагьатда оьтгерилген «Оьлмейген полк» деген гьаракатгъа Къарабудагъгент райондан башында районну башчысы Магьмут Амиралиев де булан 300 адам къуршалды. Оланы арасында районну идараларыны ва къурумларыны къуллукъчулары да бар эди. Олай да шо гьаракатда район школаланы педагоглары ва уллу класланы охувчулары ортакъчылыкъ этди.
Белгили кюйде, Къарабудагъгент райондан Уллу Ватан давгъа 4200-ге ювукъ адам гетген, шоланы яртысындан да къолайы дав майданда жан берген.
«Оьлмейген полкну» бизин районну ортакъчылары Уллу Уьстюнлюк учун ябушгъан уллаталарыны, оланы да аталарыны портретлерин тутуп шагьарны ёлларында юрюдюлер.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
