Концерт гёрсетди
Уллу Уьстюнлюкню гюнюнде, демек, май айны 9-нда, Уллу Уьстюнлюкню 77 йыллыгъына багъышлангъан байрам митинг тамамлангъан сонг, бир башлап Уллубий Буйнакскийни атындагъы ял алагъан бавну алдындагъы майданчадагъы сагьнада, сонг Гь.Гьамзатовну атындагъы ял алагъан бавда дав йылланы йырларыны концерти оьтгерилди.
Концерт башлангъынча сёз берилген, кёп йыллар районну маданият бёлюгюню ёлбашчысы болуп ишлеген, ДР-ни маданиятыны ат къазангъан къуллукъчусу Зугьра Абакарова бары да жыйылгъанланы Уллу Уьстюнлюкню 77 йыллыгъы булан къутлады, гележекде шат ва парахат яшав, савлукъ ёрады. Бары да жыйылгъанланы Уллу Уьстюнлюк учун жан бергенлени, ябушгъанланы эсде сакълама чакъырды.
Концерт программаны юрютювчюсю Барият Исмакова да жыйылгъанланы Уьстюнлюкню гюню булан къутлагъан сонг, концерт программа башланагъанны айтып, сагьнагъа йыравланы чакъырды. Сагьнагъа гётерилген, чакъырылып гелген къонакълар Албина Адилгереева, Ханума, Шамсутдин Багъатаев, Къарабудагъгент 25 номерли «Аистёнок» деген яшлар бавуну тарбияланывчулары, Къарабудагъгент 2 номерли орта школаны охувчулары, районну яшланы яратывчулукъ Уьюню тарбияланывчулары оьзлени дав темагъа багъышлангъан чыгъышларын гёрсетдилер.
Сонг сагьнагъа гётерилген Къарабудагъгент районну адатлангъан маданият Центрыны йыравлары Абулазим Найипханов, Патимат Гьюсейнова, Гилянханум Агьматова, Умия Амирова, олай да «Къарабудагъгент» деген А.Къаплановну атындагъы эргишилени хору оьзлени йырларын йырлап, тынглавчуланы харсурувларын къазанды.
Шо гюн ахшам Уллу Уьстюнлюкню гюнюне багъышлангъан концерт Гь.Гьамзатовну атындагъы ял алагъан бавда узатылды.
Тынглавчулар оьзлер учун гьазирленген концерт программа булан бек рази къалдылар.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.