Уьч оьзенни булагъы

ДАССР-ни ат къазангъан врачы, ДАССР-ни маданиятыны ат къазангъан къуллукъчусу, шаир ва язывчу И.Исаевни эсделигине гьюрмет этип, ону атын эсгермек муратда чарада ону булан бирче ишлеген врачлар, маданият тармакъны къуллукъчулары, китапханачылар, ону дос- къардашлары, Къарабудагъгент 1 ва 3 номерли школаланы муаллимлери ва охувчулары, ону таныйгъан оьзге ёлдашлар ортакъчылыкъ этди.

Чараны ачгъан район маданият ва туризм бёлюкню ёлбашчысы Найида Мурзаева залдагъылар булан саламлашгъан сонг, Къарабудагъгент районну белгили адамлары гьакъда айта туруп, олагъа абур да, гьюрмет де тийишли экенни эсгерди. Районубузну бары да юртларындан эли, халкъы учун кёп пайдалы ишлер этген адамлар чыкъгъанны, оьзлерден сонг да олар макътавгъа лайыкълы атын къойгъанны эсгерди.

-Шолай адамланы бириси бизин Къарабудагъгент районубузну Къакъашура юртунда тувгъан, кёп йылланы узагъында врач болуп ишлеген, макъамлар язгъан, шаир ва язывчу Исрапил Исаев,-деди ол.

Чараны юрютювчюсю Азинат Пашаева жыйылгъанланы Исрапил Исаевни загьмат ва яратывчулукъ ёллары булан таныш этди. Сонг И. Исаевни яратывчулугъуна багъышлангъан китап ва газет выставкасы гьакъда хабарлады.

-Исрапил Исаев студент йылларында институтдагъы ансамбльгъа ёлбашчылыкъ этген, сонг Къарабудагъгентде ансамбль къургъан, шо ансамбль Бютюнсоюз оьзбашына чалышагъан фестивальда ортакъчылыкъ этген. И.Исаев «Мени Ватаным», «Мени Дагъыстаным», «Яшасын яшав», «Бавда» деген йырланы сёзлерин язгъан ва макъамларын къургъан. Олай да кёп шаирлени шиъруларын макъамлар къуруп, йыргъа айландыргъан. И.Исаевни сёзлерине ва макъамларына гёре къурулгъан йырланы белгили къумукъ йыравларыбыз Б.Ибрагьимова, Б.Эльмурзаева, З.Атаева, М-з. Багьавутдинов ва башгъалары йырлагъан. Шаирни 4 йыры Тбилисдеги «Мелодия» деген фирманы бёлюгюнде пластинкагъа язылып чыкъгъан…, деп хабарлай А. Пашаева.

Исрапил Исаевни докторлукъ иши гьакъда ону булан кёп йыллар бир больницада ишлеп тургъан, ону къурдашы болгъан З.Залибеков бек арив маъналы кюйде хабарлады, ону атына макътавлар этди, ишине оьр багьа берип сёйледи.

-Мен Исрапил Исаевни бек яхшы таный эдим. Ол оьзю гьар оьтгереген операциясы булан, гьар сав этген адамы булан оьктем ва шат бола эди. Шо йыллар ол нечакъы адамгъа операция этди! Ол сав этген нечесе адамлар гьали де ишлей, огъар макътавлар эте,-дей З.Залибеков.

Сёз берилген район администрацияны тамазаларыны Советини председатели А.Мамагишиев, ДР-ни маданиятыны ат къазангъан къуллукъчусу З.Абакарова ёлдашлар да И.Исаевни гьакъында хабарлады. Олай да, И.Исаевни ювукъ къардашлары Камилсолтан Вагьабов, къызардашы Гьаваханум, торуну Шурият ону гьакъында хабарлады, гьар-бир агьвалатланы эсге алды. Къарабудагъгент 1 ва 3 номерли орта школаланы охувчулары, торуну Кахсур Исрапил Исаевни шиъруларын гёнгюнден охуду. Чараны барышында И.Исаевни яшавуна ва чалышывуна багъышлангъан видеофильм, слайдлар гёрсетилип турду.