Къарабудагъгент 5 номерли орта школада
Оьзге школаларда йимик Къарабудагъгент 5 номерли орта школада да сентябр айны 1-нде Билимлени гюнюне багъышлангъан шатлыкъ арив оьтдю. Байрамча безенген школаны абзарына охувчулар, оланы ата-аналары, муаллимлер жыйылып битген сонг, байрам чараны ачгъан Бурлият Къысгъагьажиева байрамны ортакъчыларын Билимлени гюню булан къутлап, олагъа кёп яхшылыкълар, уллу уьстюнлюклер ёрады.
Сонг ол байрам линейкагъа бу йыл 1-нчи класлагъа гелген гиччипавланы ва оланы муаллимлерин чакъырды. Демек, 1-нчи класланы клас ёлбашчылары Бикеабай Мусакаева ва Нарипат Гьажиева башына да тюшюп 1-нчи класланы гиччипавлары къолларында шарлар ва гюллер де булан байрам линейкагъа тизилди. Къутлав сёз булан сёйлеген Къарабудагъгент 5 номерли орта школаны ёлбашчысы Магьамматмурат Канзитдинов охувчуланы, муаллимлени янгы охув йылны башланыву булан къутлап, олагъа уьстюнлюклер ёрагъан сонг, оьтген охув йылны гьасиллерин чыгъарып сёйледи.
Сёз берилген школаны ёлбашчысыны орунбасарлары Зубайдат Мустапаева ва Адавият Агьматова да Билимлени гюнюне багъышлангъан байрамны ортакъчыларын байрам булан къутлады, охувчулагъа ва муаллимлеге охувда уьстюнлюклеге етишмекни ёрады.
Сонг 1-нчи ва 11-нчи класланы охувчуларына сёз берилди. Олар школагъа, муаллимлеге багъышлангъан шиъруланы гёнгюнден охуду.
11-нчи класланы выпускниклери «первоклашкаланы» биринчи керен школагъа гелмеклиги булан къутлагъан сонг, олагъа савгъатлар тапшурду. Янгы охув йылны биринчи зенгин 11-нчи класны охувчусу Марат Агъаев, 1-нчи класны охувчу къызлары Фатима Арсланбекова ва Ясмина Абдуллаева къакъды. Байрам чара 1-нчи класланы охувчуларыны «лезгинка» бийивю булан тамамланды.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.