Гьазирлик гёрюле

«Гетген йыл биз эсгерилген масъалагъа гёре кёп кемчиликлеге ёлукъдукъ. Демек, ЖКХ объектлер къышгъа осал гьазирлик гёрген эди.

Адамлар газ ёкълугъу саялы, сувукъ уьйлерде къалгъан гезиклер, олай энергетика якъдан бузукълукълар болуп, токлар къайтып да халкъгъа онгайсызлыкълар болду. Сонг да, тюрлю гьалларда зараллангъанлар да болду. Биз инг башлап халкъны ойлашма, гьайын этме борчлубуз.

Газ ва электрик токну къайтарагъан яда тюрлю авариялар болгъан гезиклер яй айларда да ёлукъду”,-деп эсгерген С.Меликов оьзюню сёйлевюнде.

Шолай ишлер болмасын учун бу йыл алдын ерли шолай масъалалар тергевге алынгъан.

С.Меликов айтагъан кюйде муниципал къурулувланы докладларына гёре, къышгъа гьазирлик чаралар 89 процентге кютюлген.

– Тек Ростехнадзор алдын ерли берген маълуматлагъа гёре, Магьачкъала, Дагестанские Огни, Дербент, Южно-Сухокумск, Кизилюрт, Каспийск, Избербаш шагьарларда халкъны иссилик булан таъмин этивде къоркъунчлу кемчиликлер ёлугъа. Ноябр айны 1-не бары да социал объектлеге иссилик болдурув ишлер толу кюйде кютюлюп битме герек, олай да санитар-эпидемиология гьал яманлашмасын учун бары да чаралар гёрюлмеге герек,–дей С.Меликов ва муниципалитетлени башчыларын иссилик болдурув булан байлавлу масъалалар гьакъда оьзюгер заманында билдирмекни талап эте.

Оьзюню сёйлевюнде С.Меликов «Россети Северный Кавказ» ПАО-ну Дагъыстандагъы филиалы къыш айлагъа гьазирлик болдурмакъ учун 35 районда 891 млн. манатгъа иш этгенин эсгерген. Шоланы арасында компаниядан Магьачкъалада оьтгерилмеге герекли гезикли чараланы оьтгермек учун харжлар гёрсетилмегенин де айтгъан.

Олай да «Газпром газораспределение Дагестан» ООО-ну ва газ уьлешеген сетлени арасында газны етишдирив къуллукъланы кютюв дыгъарлар къурулмагъан. ДР-ни ЖКХ объектлерин 2021-2022-нчи къыш айларына гьазирлейген Республика штабны иши гьакъда ДР-ни Гьукуматыны председатели Абдулпатах Амирханов сёйлеген.

Районларда иссилик болдурув тюзевлю оьтсюн, шогъар гёре чаралар оьтгерилсин деп уьлкебизни бир нече шагьарларына 105 млн. манат харж гёрсетилген. Шогъар гёре, гелеген йыл янгы котельныйлар, янгы иссилик болдурув системалар къурулажакъ, эсгилери онгартылажакъ.

Сонг сёйлеген ДР-ни Гьукуматыны яшавлукъ инспекциясыны ёлбашчысы Сергей Касьянов ведомствода къурулгъан оператив штабны иши гьакъда билдирген.

Яшавлукъ фондну ишин юрютеген кюйге ол оьзю гьар гюн тергевюн болдурагъаны гьакъда айтгъан. Демек, шогъар гёре гьар гюн иш юрюлегенни, шо иш тамамланма ювукъ болгъанны эсгерген.

Ерлерде къыш айлагъа энергетика гьазирлик гёрювю гьакъда «Россети Северный Кавказ»-«Дагэнерго» ПАО-ну филиалыны директору Магьаммат Абдурашитов, «Газпром газораспределение Дагестан» ООО-ну исполнительный директору Ризван Къазимагьамматов, олай да бир-бир муниципалитетлени башчылары этилген ишлер, этилмеге гереклилери гьакъда айтгъан.

Генгешни аслу масъаласын арагъа салып ойлашывну тамамлай туруп, бары да жаваплыланы къышлыкъ айлагъа иссилик болдурув масъалалагъа мекенли гьазирлик гёрмеге чакъыргъан.

– Гетген йыл къыш аян этген кюйде, иссилик болдурув масъалалагъа жаваплылар мекенли янашмагъаны ­ачыкъ болгъан эди.

Бугюнден тутуп, нечакъы къыйынлы экономика гьал болса да, биз «Россети» ва «Газпром» къурумланы къуллукъчулары булан шо тармакъны ишин яхшылашдырмакъны гьайын этежекбиз. Ноябр айда гюз-къыш айлагъа гьазирлик гёрюв ишлени гьасиллерин чыгъаражакъбыз, – деген субъектни башчысы.

РИА “Дагестан”-

“Районну яшаву”